Nama utai ti dikumbai adat sereta adat ba raban bansa Iban

Ba pupu raban bansa Melayu, adat berasal ari aki ini sida. Adat berengkah dikemeranka urung taun 2000 lalu ngerembai sama-sama enggau kesemua proses pemansang bansa. Adat ukai semina pekara selama tang chara idup. Sempama jaku Melayu madahka “ Hidup Dikandung Adat, Mati Dikandung Tanah ’ . Ba budaya Iban mega bisi jaku tuai ke munyi tu; Bejalai betungkatka adat, tinduk bepanggalka pengingat. Adat ukai semina dikemeranka orang Melayu aja tang mega pupu raban bansa peribumi bukai baka Iban, Bidayuh, Kadazan, Temuan, Jakun, Negrito enggau ke bukai. 

Adat mai reti chara, langkah rapat tauka atur bejalaika sesebengkah pekara lebuh napi pengidup besehari-sehari. Dalam kamus ti ditusun Clifford enggau Swettenham ( 1896, Part 1: 1-2) diterangka konsep adat iya nya adat [ berasal ari jaku Arab ] ti mai reti chara selama, chara nguna sesebengkah utai, ulah, tebiat, chara-ulah, gaya, pengawa gawai, pengawa rama, pengerami, turan lama tauka undang-undang[1]. 

Nitihka Kamus Dewan, adat nya sesebengkah atur ti dikemeran ari kelia menya kenyau ari aki ini ba dalam sesebengkah komuniti nyentukka iya nyadi ukum enggau atur ti patut dititihka [2] . Etimologi  leka jaku adat berasal ari leka jaku Arab iya nya “ Adah ” ti mai reti selama tauka sesebengkah pengawa ke seruran digaga belama-lama lalu selama tauka biasa nya ti tetap dipebasaka orang, ngujungka iya ke selama nya lalu nyadi adat [3] .

Dalam jaku Iban, adat ngembuan mayuh reti. 1. Adat nya atur tauka turan ti tebalan tauka udah teleba dikena. 2. Adat nya endang ke pendiau; sigi ke jelan tauka peneleba [4]. Ambika banding; endang adat kitai bebayar udah berutang. Adat mega mai reti bayar, ambika banding; bayar ti diberi ngagai dukun tauka manang, enggau orang bukai, mampas iya tauka ketegal pengawa ti dikereja iya. Sekeda chunto tu nyengkaum derian, sabang, upah enggau pengeras. Ambika chunto, adat ke diberi siku-siku orang ngagai manang nya nyengkaum siku manuk, sigi kebuk enggau sebilah duku. 

Derian nya perengka baka duit tauka utai bukai ke nyengala diberi lelaki ngagai indu ke dekaka bini iya nitihka pinta sereta enggau pematut dikena nipak pemisi bilik penaik indu nya baka ke ditentuka orang ke ngatur pengawa melah pinang nya. Ambika chunto; kelia menya bisi orang minta derian sigi tajau menaga, sepemansai telu manuk enggau antu pala sigi engkabai betutupka selebuan gung.

Sabang nya diberi ngagai orang ke alai kitai ngambi ubat tauka berubat dikena ngelekatka pemisa ubat ti baru diambi tauka dikena nya. Sekeda chunto sabang nya perengka baka duit, mangkuk, chapak, kain, jarum, papung besi anak benda enggau ti bukai. 

Adat mega dalam budaya Iban nya bayar ti dikeluarka pesalah ketegal penyalah iya baka tunggu, ukum enggau timbang. Ambika chunto; Igat dipinta tuai rumah ngisi adat ketegal nebah radio lebuh sida serumah mengkang ngulit.

Timbang nya bayar ukum dikena ngisi adat tunggu tauka dikena nganti penggeluya indu. Timbang balat agi dikena ba pengawa bebayarka ukum ketegal sarak. Ambika chunto; 1. Tak timbang sekali mega bini nuan enti nuan enda ulih agi jadi enggau iya, anang beduan iya baka ke udah. 2. Bayar timbang adat tunggu ninggang nuan ke ngeluntang lalau tangga rumah orang.

Tunggu nya ngembuan dua iti reti dalam adat budaya Iban. Kesatu ukum enggau adat asal Iban. Tu nyengkaum genselan ngena babi idup tauka manuk, kekadang telu manuk lalu ditambah enggau kering semengat baka duku tauka besi sereta enggau kurung semengat baka kebuk tauka benda. Siku-siku orang nya ditunggu ketegal udah ngelanggar penti pemali, ngisi pemali ti berat ke tau ngudika menua baka jadi melaki bini kelalu nyempil salah serak. Pemesai tunggu tau ditambah sekalika dikurangka nitihka pengentap ati tuai ke ngeletakka iya. Ke selalu agi lebuh udah ngeletak pemesai tunggu, dia iya nanya orang ke ditunggu nya munyi tu; Ni kedekaka nuan, ngena kijang perut puang tauka kijang perut kenyang? Reti nya ni pilih orang ke salah ditunggu iya nya mayar tunggu setengah aja tauka mayar penuh. 

Reti tunggu ti kedua nya bayar tunggu enggau isi barang nyengggala tau mega dikumbai kapar. Ambika chunto; Iya kena tunggu (kapar) sepuluh uta, iya nya dua puluh singkap pinggai. Tunggu kapar udah dikemaduka laban kelalu ribat laban orang ke ditunggu tau nadai ngembuan igi benda nyenggala nyampau ti dipinta dikena ngisi bayar tunggu nya. Nya alai tunggu kapar ditukar ngagai mata duit, reti nya enda ngena kapar barang segenda agi.

Belalauka penerang di atas diarapka raban pemacha ulih nemu reti adat dalam budaya bansa Iban.

Penyanding Penemu

1 Anwar Din, Kesusasteraan dan Kebudayaan Melayu, Pusat Pengajian Bahasa, Januari 2007, hlm 24-25
2 Dr.Teuku Iskandar, Kamus Dewan, Dewan Bahasa dan Pustaka, Kuala Lumpur, 1984, hlm 56
3 S.Gazalba, Penghantar Kebudayaan sebagai Ilmu, Pustaka, Jakarta,1990,hlm 296

4 Janang anak Ensiring, Jantan Umbat, Robert Menua Saleh, Bup sereba reti jaku Iban, Tun Jugah Foundation, 2011