Peluang Nyadi Penulis Jerpan

Tu siti berita manah ke deka dipekunsika enggau raban pemacha blog Tempalai Kenang. Enti ngelama tu kita suah macha ba blog aku baka ni deka nyadi penulis. Diatu bisi peluang besai ngagai kitai ke bisi pengelandik nulis karya kreatif nguji sereta ngasurka pengelandik nulis jerpan laban udah bisi ruang alai bala kitai. Berita tu diambi aku ari surat berita Borneo Post ke madahka Borneo Media Solutions (BMS) benung nesau mensia mayuh enggau ngambi bagi ba Pekit Ngarang Cherita Pandak.

Nitihka penerang nya, karang ke digaga nitihka peneka ati, iya nya belalauka kreativiti diri empu lalu ukai ensera tauka main asal. Tuai Besai BMS Johnny Chuat madahka karang pun cherita ke diterima masuk pekit deka dipilih ari pemanah jalai jaku Iban lalu enda mayuh salah sepil Iban tauka enda mayuh salah chara nguna tanda bacha. Sebedau neruska karang panjai agi, pengarang enda tau enda nganjung pun cherita 10 lambar. Tu dikena sida nentuka karang kita nya diterima masuk pekit. Pengudah karang dipilih ulih masuk bepekit, karang penuh enda tau enda ditembuka sebedau 30 Jun 2014,” pia ku iya madah. Pemanjai karang 100 nyentuk ke 120 lambar ba keretas sais 5 inchi X 7.5 inchi, ditaip ngena ‘Microsoft Word, ‘font Time New Roman’, sais 11.

Iya mega madahka pekit nya enda diteruska enti kurang ari enam iti karang diterima nyentuk ngagai ujung Mei 2014 tang taja pia, sida ke dipilih  ke kurang ari enam iku nya deka diasuh neruska karang tang karang nya enda dipekitka, ke alai sida deka dibayar ngena royalti enti karang sida dichelak.

Semua karang ke diterima masuk pekit tu deka diempu BMS. Taja pia, pengarang tetap beempu nama nyadi pengarang ba bup nya enti dichelak. Atur tu bisi pengelentur, lalu tau dirunding enggau sida. Semua karang enda tau enda dikarang dalam fail ‘soft copy’ lalu dikirum ngena emel ngagai borneomedia2u@gmail.com. Champian ba pekit tu deka nerima mata duit RM1,000 lalu ditangkan RM800 ba penuduk lumur dua sereta RM600 diberi ngagai pemekit ba penuduk lumur tiga. Kelimpah ari nya, 10 iku pemekit ke bukai deka nerima perais sagu ati RM300.

Penerang silik bekaul enggau pekit tu tau dipeda nengah lawan web www.borneomedia2u.com tauka betelefon ngagai Johnny nengah lumur 013-5755769.