Pengajar nisih prestasi nembiak

Lebuh Penilaian Menengah Rendah (PMR) baru dipejalaika taun 1993 dikena nganti Sijil Rendah Pelajaran (SRP), mayuh bala iban meri komen ke bebida. Ukai semina mensia mayuh, nembiak enggau raban sekula mega beba runding lebuh napi sistem peresa nasional betukuh baru maya nya.

PMR diperatika kemerah agi laban nembiak nadai agi napi penanggul tinggal ­pelajar sepengudah pom tiga tang SRP begunaka nembiak besedia meri pesan selamat jalai ngagai sekula enti sida enda pas ba subjek ke patut pas.

Kemaya hari tu, senario ti sama sekali agi datai napi mensia mayuh lebuh PMR diketuka lalu digantika enggau Pentaksiran Tingkatan 3 (PT3). PT3 ti dikira idea baru ari Opis Menteri Pelajar Malaysia ungkup sistem peresa nasional tang taja pia iya terus nerima jaku pejah laban pemujur iya bedau ulih dipeda. Iya semina ulih diperati mujur sepengudah pemutus nya ditaburka ba pengujung taun 2014.

Dalih ke diberika sekeda mensia mayuh nya pengirau senentang PT3 ti dikumbai sida bisi kaul terus enggau Tisih Belalauka Sekula tauka Pentaksiran Berasaskan Sekolah (PBS) ti kala dikumbai sida siti sistem ti penuh polemik.

PT3 mega dikirau laban nangika sejarah datai betandu baru baka Pengajaran dan Pembelajaran Sains dan Matematik Dalam Bahasa Inggeris (PPSMI) ti puntan ba tengah jalai sebedau pengulih iya ulih ditemu manah. Nya alai nadai salah enti mensia mayuh nangika pengulih pemanah PT3. Nya dikiraka hak sida ngenataika asai ati diri.

PT3 diberitaka ulih ngangkatka pemujur nembiak ngambika sida ngembuan ulah ke global agi, ulih berunding ba tikas tinggi, kelimpah ari ke ngemulaika baru kuasa autonomi pengajar ke udah lama lenyau dibai hari, tenggelam dipangka gumbang pemansang pelajar.

Pengarah Pusat Penasihatan dan Penempatan Kerjaya Graduan, Fakulti Pendidikan dan Pembangunan Manusia, Universiti Pendidikan Sultan Idris, Profesor Dr Sahandri Gani Hamzah madahka, PT3 ti nganti PMR patut dianggap fasa baru sistem peresa nasional ti berorentasyenka pengarap ngagai pengajar sereta pengulih nembiak. Enti ngelama tu semua atur pengawa peresa nasional dilempaika ba Lembaga Peperiksaan (LP) tang PT3 tu berengkah nyadi simbol ti meri kuasa pulai ngagai pengajar nisih nembiak sida empu. Reti nya PT3 nyura sejarah nyadi siti sistem peresa nasional ke nyadi rintis ngagai pengajar nentuka pengulih nembiak berengkah ari pom satu nyentuka sida ngambi peresa. Sebedau tu semua nya ba baruh LP tang diatu pengajar enggau sekula nya empu ke bejalai sereta meratika pemujur sistem peresa. Reti nya penuduk pengajar enggau sekula ulih sama ngang­kat pengulih nembiak ba bidang akademik, jasmani, sosial enggau ke bukai. PT3 bisi kait terus enggau PBS. Iya tetap ngembuan tuju ti besai agi kelimpah ari ke nitih standard.

Ambika banding SRP, digaga dikena nganti LCE (Lower Certificate of Education). Udah nya PMR lalu diatu PT3. Tiap-tiap sistem peresa nasional ke digaga ngembuan tuju enggau visyen iya empu dikena ngisi taga nitihka ubah pemansang kemaya hari tu. Semina ke mida iya enggau ke lama nya pemujur PT3 suah dikirauka laban ­konflik enggau polemik PBS ke ngemediska pala mensia mayuh. Persepsyen bala iban senentang PT3 enda ulih dikenggaika. Pengawa nyakal, mejah sereta persepsyen nya pekara selama utai baru kelebih agi baka sistem baru.

Suba lebuh PMR n­ganti SRP, mayuh orang ngumbai iya enda ulih tan lama laban sida udah teleba enggau sistem peresa ke lama. Taja pia lebuh PMR nya dikemanahka ninting taun ngujungka iya tegap. Nya alai PMR ulih tan sepengelama lebih dua dekad. Baka nya mega ke patut digaga enggau PT3. Nengah PT3, nadai agi peresa bepusat ngagai nembiak pom tiga baka PMR ngelama tu.

PT3 muka ruang luas agi ngagai raban sekula ngatur, nisih lalu meri skor ngagai tisih nya bemalinka instrumen malin atur skor ti disediaka LP. LP enggau penisih luar ti dipadu mekuh pengawa sida deka bejalaika pengawa moderasyen enggau verifikasyen sebedau ripot dikeluarka sekula. PT3 agi ngemeratka instrumen tisih betulis enggau tisih lisan ba subjek Bahasa Melayu enggau Bahasa Inggeris baka PMR suba.

Sains, Matematik, Pendidikan Islam, Kemahiran Hidup, Bahasa Arab, Cina, Tamil, Iban enggau Kadazandusun deka begunaka instrumen betulis aja.

Sejarah enggau geografi deka ditisih nguna mayuh bengkah instrumen baka pengawa betulis, ujian amali, projek, kajian lapangan tauka kajian kes. Taja pan nadai mayuh bida, instrumen mayuh bengkah baka betulis, ujian amali enggau projek meri peluang ngagai nembiak dikena ngerembaika pengelandik sida.

Semua instrumen digaga dikena ngasilka nembiak ke ukai semina meri perati ngagai sukut akademik aja tang mega ke ngembuan pengelandik bukai.

Pengulih nembiak entara pangan diri sigi enda sama. PT3 digaga ngambika nyukup elemen PBS awakka pengulih nembiak diperati ari pengulih siku-siku.

Taja pia pengurang tetap bisi ba PT3 kelebih agi ba pengawa beberika mark lalu lebuh merati-tisih nembiak. Tang pengurang ti baka tu ulih diputarka seraya ke ngemasukka elemen etika sereta profesionalisme lebuh bejalaika pengawa. Pengawa ti enda rentang nya kadang-kadang enda ulih diseliahka tang pengajar ulih dilatih bepegai ba prinsip ke ludas.

Pengarap mensia ngagai pengajar mega patut tinggi. Nya alai nadai kebuah pengajar ke beretika deka ngelangkah profesionalisme pengajar. Beri mih pengadang enggau pengarap ti tinggi ngagai raban pengajar nentuka pengulih nembiak.

PT3 enggau PBS ulih meri pengarap baru ngagai pengajar ke ngelama tu udah lama lenyau. Tu mih maya kitai meri pengajar nya ‘kuasa’ dalam pengidup nembiak. PT3 mega meratika aspek negapka nembiak ba mayuh bengkah pengelandik nengah proses belajar enggau ngajar. Enti ngelama tu PMR meratika pemandai enggau prestasi nembiak ba akademik aja tang PT3 mungkur aspek ke besai agi. Prestasi nembiak ditisih nitihka tikas ti disukung nengah pengulih ‘band’ sereta mega pengelandik sosial enggau pengulih bekomunikasyen. Tu mih ke ngangkat PT3 nyadi siti sistem peresa ti chukup laban semua pengulih nembiak sekalika nya akademik tauka pengelandik bela dirangkum dalam siti sistem.