Kes Mati Ngenyit

BERITA pemulai individu ke danjan dibai bulan lesi dibai hari maya umur agi biak balat bendar ngenyitka ati. Enti diperatika ari mata kasar sida tu dipeda sigi gerai nyamai lalu nadai kala didinga bisi pemedis, sakit lengit tauka tabin bebirin. Taja pan baka nya sebedau aku ngenangka enggau lenak pekara tu dulu aku ngingatka diri empu sereta raban pemacha iya nya ajal enggau pemati nya ba kitai ke bisi ngembuan pengarap baru nya endang ba jari Tuhan. Barang maya iya deka ngambi kitai. Taja pia nya ukai reti iya kitai tak nyerahka ngagai takdir ke pekara tu nyadi.

Mati ngenyit tauka sudden death tu enda milih umur. Taja pia nitihka pansik iya ke suah agi nya nyadi ba sida ke beumur 45 taun ke atas. Iya mega ulih nyadi ba sida ke agi biak ari nya baka entara sida ke beumur bebelas taun nyentuk ke 30an. Enti iya nyadi ba sida ke beumur 30 taun ke baruh  suah iya ketegal penanggul ba tungkul atau, iya nya suah bekait rapit enggau struktur tungkul atau ti enda normal tauka ritma tau mega dikumbai rentak tungkul atau ke enda normal. Tu nyangka ketegal purih.

Sekeda pekara ke bisi kaul enggau faktor tu iya nya enti bisi kaban belayan ke sempil mati ngenyit maya umur sida agi biak, tauka simptom mudah luput lebuh bejalaika aktiviti fizikal. Taja pan faktor baka ke disebut nya tadi ulih nyadi tang insiden ti baka tu agi mimit lalu suah agi dikumbai kes-kes ke nyelai ari selama, ambika banding baka lebuh pekara tu nyadi ba atlet tauka raban pemain profesional, chunto iya pemain bol menua Sepanyol, Antonio Puerta, 22 enggau pemain Brazil, Serginho, 30 ke tumbang lalu mutuska seput maya bemain.

Pun mati ngenyit ti baka tu ti patut diberi perati nya ketegal penyakit tungkul atau koronari. Nyau naka pengelama dia gemu ke nyadi asil ari proses arterisklerosis begumpul ba dalam buluh tungkul atau koronari. Dalam sekelip mata lalu dipengulaika enggau mayuh macham stres tauka aktiviti fizikal lebuh utai tu nyadi dia alur nya enda mukai-mukai lalu sebat. Tu ngujungka orang nya diserang sakit tungkul atau ti serius.

Pekara tu mega ngasuh kompikasyen tungkul atau baka rentak tungkul atau ti enda stabil ke ulih terus mai nyawa enti enda diperubatka enggau jampat. Kadang-kadang taja pan udah diubat, pesakit agi enda ulih ngeleda laban serang tungkul atau ti raya amat.

Nitihka pelajar, bisi sekeda simpton tungkul atau ke patut diambi peratika enggau serius. Entara simptom nya baka ; pedis dada tauka sendat seput kelebih agi enti iya nyadi ketegal aktiviti fizikal; mudah luput tauka asai tungkul atau ke bedebar-debar enggau jampat enggau nadai kebuah-buah; jampat lelak, kembai ba buku ali sereta dientudika enggau sendat seput.

Suah agi kitai endang enda nemu diri bisi ngidap penyakit tungkul atau. Nya alai munyi ku lutur, dikena kitai nentuka tungkul atau kitai gerai kitai enda tau enda beperesa mungkur semua selangkuh tubuh ti bisi kaul rapit enggau tungkul atau. Nambahka nya kitai mega patut besedia napi pekara ke ulih nyeliahka diri ari kena sakit tungkul atau tauka diserang sakit tungkul atau.

Nya mih kebuah sida ke gawa ba bidang pengerai seruran ngelalauka kitai, nuan enggau aku ngubah gaya pengidup baka pengawa ke ngetu nginsap, mayuh agi besenam, nyaga pemayuh gemu tauka lanyih ti diempa, ngetanka pemerat tubuh ti ideal lalu ngemeran gaya idup enggau chara pemakai ti bepengerai. Kitai mega dipinta nyeliahka stres ti mayuh sereta diasuh suah beperesa tubuh. Tu setipak bendar enggau jaku tuai ke munyi tu; Prevention is Better Than Cure  .

Penyanding Penemu:

Majalah iSihat Mac 2011, Bil: 40