Sistem
pelajar ti ngemeratka peresa nya deka nyadi ‘silent killer’ ngagai menua jemah
ila, pia ku Sapit Ketuai Direktor Pelajar Malaysia (Sektor Operasyen Pelajar)
Datuk Safa’at Tumin. Kebuah pia, sistem pelajar ti beratka peresa enda ulih
nempa nembiak rebak dudi ti ngembuan pengelandik ke sebaka ba semua bidang. Nitihku
iya nengah sistem peresa, nembiak ti teulihka 9A+ dalam peresa perintah ukai
reti sida ngembuan penaluk enggau penyerakup lebuh udah besai ila, tang
pengujung ila ulih ngerusak menua.
“Engka enda mayuh orang nemu, ngemeratka sistem peresa
aja nya ‘silent killer’ laban enda ulih nempa nembiak ti ngembuan pengelandik
ba semua pekara.
“Pelajar ti bepelasarka peresa enda ulih nempa nembiak ke
nyulut dalam akademik sereta ngembuan ulah ti manah, nya semina ulih
dipejalaika nengah PBS ti enda ngemeratka akademik aja tang mega
ngemansangka runding, fizikal enggau pemereti ati,” pia ku iya.
Iya bejaku munyi tu ba pengerami nutup Aum Transformasyen
PPD Begulai enggau Pengelola Sekolah-Sekolah Malaysia 2014, ditu ensanus.
Nya alai ku iya, raban pengajar enggau apai indai patut
arapka sistem Pentaksiran Berasaskan Sekolah (PBS) ulih dikena nempa nembiak ke
ukai semina nyulut dalam akademik aja tang mega ngembuan ulah ke manah.
“Kitai enda patut terus madah, ketuka PBS lebuh ke betapi
enggau penanggul, kitai patut berundingka pengidup anak dudi hari ila.
keterubah bendar kitai endang nadai peleba ngena nya, menua Hong Kong begunaka
timpuh 11 taun ngenegapka diri ngena sistem nya,” pia ku iya.
Ku iya,taja pan PBS ngembuan pengelemi sereta baru tiga
taun udah dipejalaika ba sekula sekondari, tang nya ukai kebuah iya diketu tang
patut diperundingka jalai kena ngemanahka iya.
“Kitai anang bepikir, enti nadai sistem peresa nadai guna
agi mih sistem pelajar nya. Nya runding ke salah. Enti majak dipejalaika,
(pelajar) kitai deka bepanggai ba peresa belama.
Ku iya, “PBS nya ukai semina ngemeratka peresa, tang
bepelasarka pengawa belajar enggau ngajar”. PBS ngemeratka pemansang
(dalam pelajar) nembiak, ari pun ukai semina ba pengujung lebuh sida ke ngambi
peresa perintah.
Tiap kali peresa ninting bulan diatur, tanya ke diberi
ngagai nembiak dalam kelas ke bendar nya pentaksiran berasaskan sekolah tang
PBS nya mungkur semua pekara baka fizikal, lumba enggau main sereta ko-kurikulum
ti ulih kena nentuka pengelebih nembiak jemah ila.
“Tu ukai pekara baru dalam sistem pelajar, laban PBS
mayuh pengelebih, ulih kena nentuka pengeregas nembiak dalam kelas lalu maya
nya mega pengajar ulih meratika pemansang nembiak dalam akademik sereta
pengelandik,” ku iya.
Kelimpah ari nya, iya madahka apai indai enda patut irau
ati ke PBS laban tiap penyulut nembiak deka diterangka enggau silik, ukai
semina ba pemutus aja.
“Enti semua bejalaika pengawa, chakah sereta andalka PBS,
nya ulih dikemujur lalu juluk nempa rebak baru ti bepenemu enggau ulah manah
ulih dijapai,” ku iya. –Dibali ari Utusan Borneo
Tiada ulasan:
Catat Ulasan