Jalai tampung sepengudah SPM tauka STPM

Panyun Jaku

Meri tabi puji ngagai bala nembiak sekula ke bulih pemutus peresa ti lati dalam peresa SPM enggau STPM 2013 ti baru udah dikeluarka bedau lama ti udah. Tentu diatu raban nembiak udah enda tan ati deka milih kus enggau kuing tuju ti deka nampung pelajar ba tikas ke tinggi agi. 

Bah baka ni ngagai nembiak ti bulih pemutus peresa ke selama aja kiraka  chukup makai aja dih? 

Enda milih mih baik pemutus nuan nya lati tauka chukup makai aja, kitai patut nemu mayuh jalai ti udah disediaka Opis Menteri Pelajar Malaysia (KPM) lebuh ke nentuka rayat Malaysia, terus tulihka pelajar ke tikas ti pengabis tinggi ti ulih dijapai tiap-tiap individu. 

Nya alai, seraya enggau pekara nya ditu aku nguji bekunsi rintai sekeda jalai tampung ti ulih dipilih bala nembiak sekula ngambika ulih nyambung pelajar sepengudah SPM kelebih agi ba jalai nuju program degree keterubah!

Pom 6

Nengah jalai tu bala nembiak ulih masuk universiti ngena pemutus peresa STPM.  Nengah sistem peresa modular ti baru, tiap-tiap semester nembiak deka diuji. Tu ke bendar tau dikiraka udah berengkah nyingkang ngagai dunya belajar gaya universiti laban nengah chara tu nembiak dikiraika enggau chara sereta gaya belajar ba universiti.

STAM

Enti nembiak milih jalai tu dia sida ulih masuk universiti nengah pemutus peresa Sijil Tinggi Agama Malaysia, STAM. STAM tu diungkup nembiak pom 6 ari bidang pengarap.

Matrikulasi

Tu mega siti ari jalai ti popular bagi sekeda nembiak lepas SPM ti bulih pemutus peresa ti lati sereta iya ke jelan lati. Kus ti bisi disediaka nya nyengkaum Sains Tulen, Kejuruteraan enggau Perakaunan. Timpuh maya program matrikulasi tu sepengelama entara 1 tauka 2 taun bepanggai ba kus ti dipinta. Nembiak ditempatka ba Kolej Matrikulasi ba serata Malaysia. Udah nya sida deka ditempatka ba universiti ti udah dipilih nitihka kus pilih enggau mega pemutus peresa ujung taun matrikulasi.

Asasi

Program asasi mega ke bendar nya sama baka program nyendiaka diri sebedau ke tikas degree, iya nya program matrikulasi. Bida nya, program asasi diatur sida universiti nya empu, baka Universiti Malaya (UM) enggau Universiti Islam Antarabangsa Malaysia (UIAM). Pelajar ke bulih program asasi, suah agi dianjung ngagai universiti ti sama sepengudah sida tembu program.

PISMP

Program Ijazah Sarjana Muda Perguruan (PISMP)  tu mega program ti popular dipilih nembiak ke bulih pemutus peresa ti lati. Bala nembiak deka nitih program tu sepengelama 4 taun ditambah 1 taun program nyediaka sida. Tu mega jalai ti jampat sereta likun ngagai nembiak lepas SPM. Nembiak ti udah dipilih deka dianjung ngagai di Institut Pematih Pengajar ke bisi ba semua nengeri di Malaysia bepelasarka kus ti dipilih.

Program Persediaan Luar Negara

Ba program nyendiaka diri ke menua tasik, program bisi disediaka ngagai nembiak ke bulih pemutus peresa ti lati amat. Suah agi nembiak tu mega deka diberi sekulasip penuh ari JPA. Kelimpah ari JPA, bisi mega agensi bukai baka MARA sama bela melanja nembiak nampung pelajar ke menua tasik.

Diploma(IPTA)

Ngagai bala nembiak ke udah enda liat agi deka berengkah belajar ba tikas ti  tinggi agi dia tu mih program ti engkeman dipilih bala nembiak. Mayuh kus ti bisi disediaka IPTA baka UiTM enggau UTM. Kedua-dua agensi tu bisi nyendika kus diploma ngagai nembiak ke udah lepas SPM.

Diploma (POLITEKNIK)

POLITEKNIK mega pilih ti nemban ngagai nembiak ke udah lepas SPM ke deka nampung pelajar ngagai tikas ke tinggi agi sereta balat agi ngemeratka kus ba bidang teknikal. Kus ti disedia POLITEKNIK nya mayuh agi ari ke bukai. nambahka nya mega kemaya hari tu, nembaik udah lepas Diploma ari POLITEKNIK mega bisi ke manah agi dikena sida nampung pelajar ke tikas degree ba sebarang POLITEKNIK ti bisi nyendika kus ti sebaka. 

Diploma (IPTS)

Ngagai nembiak ke bisi agi penatai pemisi tauka iya ke bisi pengerindu ba bidang ti nadai disediaka ba sebarang IPTA, ulih minta nampung pelajar ngagai  IPTS. Enti milih IPTS nembiak dilalau bejimat enggaika puntan belajar semina setengah jalai aja. Taja pia kemaya hari tu udah mayuh amat IPTS ti bekualiti sereta mujur ngeluarka graduan ke sebaka tikas enggau sida ari IPTA.

Diploma Kemahiran Malaysia

Kus Diploma Kemahiran Malaysia disediaka ngagai nembiak ke bisi pengerindu ba bidang pengelandik. Nembiak ti baka tu ulih masuk Institut Latihan Perindustrian, Kolej Komuniti, Akademi Binaan Malaysia CIDB enggau mayuh agi institusi ti bukai. Iya mega ukai semina disediaka ngagai pengelandik ba bidang industri aja, tang mega pengelandik baka betukang enggau bumai betupi. 

Kerja (5 Taun Peneleba)

Ngagai sida ke deka bekereja dulu, peneleba bekereja sepengelama 5 taun mega ulih dikena lebuh minta sekeda kus ba tikas degree. Opis Menteri Pelajar bisi nyendiaka ruang enggau siti jalai kediri dikena sida ke udah bekereja sereta ngembuan peneleba lebih 5 taun nampung pelajar ke tikas ke tinggi agi.

Penutup

Enggau kenang tu aku ngarapka bala nembiak ke baru udah bulih pemutus peresa SPM enggau STPM berunding enggau memanah pekara ti patut dipilih ngambika pengidup jemah ila mujur sereta lantang. Semua pekara ti udah dirintai ulih dipilih raban nembiak.