Amai tauka enda Kerita Proton diatu manah agi ari suba?

Lama udah deka bejaku senentang kerita Proton tang ketegal mayuh agi pekara bukai ngasuh cherita senentang pekara ti ditangguh nyentukka diatu. Sekali kitai aram kitai sama ngenang pengamat kerita Proton ke tebilang enggau kerita bansa Malaysia tu dikira manah agi ari sukut kualiti enti dibanding enggau suba.

Kemaya hari tu standard quality control kerita Proton bisi udah manah mimit ari ke suba tang kadaka kerita ke dipansut nya bisi manah agi ari iya ke dikeluarka sedekad suba? Bisi tauka enda Proton ngubah chara iya bekereja? Dalam ujung taun 1990an enggau awal taun 2000an, kerita Proton endang tebilang ketegal kerita ke nadai bekualiti sereta nadai datai ba tikas standard ti patut. Ambika banding sistem elektrik kerita nya kadang manah kadang enda lalu pia mega enggau mekanikal tauka injin nemu tak jai sepengudah beberapa bulan udah diguna. 

Aku ke bejaku tu endang belalauka peneleba neriba Proton Wira aeroback. Beberapa bulan udah meli kerita tu enda memukai wiper belakang lalu jai, baka nya mega sensors reverse enggau pengelekat ba pintu mua nemu tak tebelengka kediri. 

Utai ke tau dikira manah pasal kerita tu nyangka injin iya aja laban ke berasal ari injin Mitsubishi. Aku endang nadai tentu ninga serebana bala orang ke bisi kerita Proton senentang injin kerita tu. Baka ni kati nuan neriba endang nadai tentu ngawaka injin tu.  

Taja pia utai ke uji ditanya ditu nyangka bisi tauka enda Proton belajar ari penanggul dulu suba lalu nguji ngambika langkah rapat ke nempan dikena sida mutarka isu QC? Kati sida enda nemu peranak menua Malaysia lalu ukai pemeli ari UK  ke angkun agi meli kerita tu lalu kebuah pemansang ekonomi? Orang Malaysia mayuh ke nadai pilih bukai laban nya mih kerita ke dikira ke ulih dibeli mensia mayuh.

Tengah taun 2000 Proton diperatika balat besemekih enggau raban menua Asia ke bukai lebuh iya berengkah mantaika model baru baka Waja, Gen2, Savvy, Saga BLM, Satria Neo enggau kerita Persona. Pengaga kerita tu udah nadai tentu agi bepanggai ba kompeni Mitsubishi agi. Kiraka keterubah iya dalam timpuh sepuluh taun Proton nyau ulih dipeda bediri kediri. Taja pia endang enda ulih diseliahka mega isu ti bekaul enggau kualiti baka ke kala didinga kitai iya nya senentang penanggul power window tang ari semua tu kerita Proton sigi diperatika bisi mandangka segang pemansang. 

Udah nya lalu datai mega model baru ke dikumbai Inspira ke semina nukar chap ari Mitsubishi ngagai Proton. Baka ke udah dipeda dalam taun 1990an, ngechap baru Lancer lalu nganti iya enggau nama Wira.  Proton baka ke pulai ngagai chara lama. Bisi mih kompeni nya nguji meri dalih lalu madahka kebuah sida ke baka nya laban ku sida nadai bedaya ngaga kerita baru. Tang mayuh orang Malaysia ngumbai nya enda tentu amat laban ku sida, Proton semina ngena chara mudah ngulihka duit, lembau ngaga kerita baru. Nyamai agi tak meli model ari orang bukai semina nukar chap aja.

Udah kerita nya lalu dibantai mega kerita bansa baru iya nya Preve enggau Suprima S. Atas keretas kedua-dua kerita tu diberitaka bisi mansang selangkah ari ke biasa disediaka Proton ngelama tu. Keresa dalam ti manah agi lalu mayuh perengka bukai kelimpah ari injin turbo bisi bendar mandangka Proton nya mansang semadi mih iya dibanding enggau Perdana V6. Tang ari sukut realiti, kerita tu agi jauh bendar ari ke patut dikemegahka kitai. Kerita ke baru dijual tu  mega bisi nerima serebana ari mensia mayuh ke meli kerita tu. Serebana baka penanggul eksos enggau turbo ti ngasuh injin nya balat makai minyak nya sekeda ke didinga ari bala ke nguna kerita tu. 

Enti dibanding enggau kerita Korea nyangka agi jauh mega kerita kitai tu tinggal. Orang Korea diperatika pandai agi napi dagang global. Sida endang betunggang lupung sereta enggau naka ulih mantaika model ke manah disempulang enggau teknologi baru. Kelimpah ari nya mega sida nguji nyual produk sida baruh rega ari enggi kompeni bukai. Taja pan pia kerita Jipun tetap agi tebilang ari kerita bukai sereta balat agi diterima mensia mayuh. 

Taja pan bisi nerima duit bantu ari DRB-HICOM, Proton tetap enda ulih nunda pemujur orang Korea tang iya dipelabaka ulih beranyut berubah udah ke nerima bantu nya. Sida patut nyual produk ke manah sereta bekualiti ngambika pemeli gaga meli kerita sida. Nya aja ke dipinta raban pemeli kerita Proton. Orang Malaysia enda melaba Proton ulih besemekih enggau orang Jipun enggau Jerman ba tikas ke sama tang sida nadai patut enda ulih. Ubah mih chara kereja sereta badu nerima vendor ke enda kompeten. Kerita ti digaga belalauka runding ti ulih diarapka nya ke patut diterima; nadai ngawa enti kerita Proton nadai kamera reverse asal aja kerita nya ulih start,  bejalai lalu ngetu enggau nadai penanggul. Nya mih kerita ke dikumbai kitai manah!

Kualiti endang diperatika bisi manah agi ari suba tang bedau datai ba tikas ke dekaka kitai. Ari sukung mata duit ari DRB-HICOM, Proton nyangka ulih besemekih enggau kompeni kerita bukai ba tikas global, tang deka tauka enda sida berubah? Munyi ku sempama jaku tuai; enti deka alah enda, enti enggai bisi tau mih nadai.