Bekal Oh Bekal

Tungkus asi

Dulu agi ari tu aku udah bekunsi penemu enggau kitai sebuat senentang leka jaku midang, bidang enggau pemidang, kelebih agi leka jaku pemidang laban bisi ngaru mimit ba penemu aku. Nya udah diterangka aku enggau lenak nitihka anak penemu aku empu belalauka asal jaku Iban disebut sereta prinsip linguistik ke dikena ba sekula.

Nyadi sekali ti aku mai kitai sebuat beratika leka jaku bekal ke suah bendar dikena bala pengarang berita ba surat berita sida tauka ba radio baik nya radio perintah tauka pribit.

Bekal nitihka penerang ari Bup Sereba Reti madahka nya leka jaku nama ke mai reti pemakai ti nyengkaum asi, berau/beras, lauk etb. ti dibai ke empa lebuh turun tauka mindah apus hari tauka lebuh bemalam ba tanah. Ambika chunto; Sida ke beban nya bebaika bekal. Bekal tu mega ulih nyadi jaku turu lebuh ditambah enggau sekeda leka jaku lalu bisi mai reti ti nyemetak. Peratika penerang di baruh tu.

Bekal mata (disebut mata’) reti nya bekal pemakai ke bedau dipanduk baka beras ti dibai ke bekal.

 

Ringkat

Bekal mansau nya baka asi enggau lauk. Bekal pemakai agi menya suah ditungkus ngena daun baka daun buan, daun pisang tauka upih pinang. Kemaya hari tu bekal pemakai disimpan ba dalam ringkat tauka tungkus polystren, empelus enggau kutak plastik.

Taja pia leka jaku bekal mega tau dikerembaika reti iya ngagai pekara ti bekaul enggau pelajar baka pengelandik, ajar, daya idup, budaya etb.ti disadang tau diguna ke pesindang idup dudi hari. Chunto ayat – Nembiak rebak baru patut ngembuan pelajar tinggi ngambika bisi bekal sida jemah ila.

Leka jaku bekal mega tau diberi jaku penambah ba mua tauka dibelakang leka jaku nya. Ambika banding; bebekal. Ba sukut tu iya udah bebali nyadi leka jaku pengawa. Chunto ayat – Kami semina bebekalka asi enggau garam aja tadi.

Kelimpah ari ke mai reti ti bisi bekaul enggau pemakai leka jaku bekal mega ulih dikerembai reti iya ngagai jaku lalau tauka ajar. Ambika banding, leka jaku bekal mega ulih bebali nyadi mekal ke mai reti meri bekal, meri ajar; ngelalau. Chunto ayat – Bala apai indai seruran mekal anak sida ngena jaku ajar ti beguna. Ba sukut tu leka jaku bekal nya jaku ajar orang ke tuai. Iya mega tau mai reti adat basa tauka pana. Ambika chunto; Bekal bai sanu ke mati nya diaduka sida ke tuai sigi alas.

Simpul Penemu

Nyadi nya ke baka penerang aku senentang leka jaku bekal. Ba penemu aku leka jaku bekal patut ditanka reti asal iya baka ke udah diterangka aku di atas tadi. Kebuah pia, nya mih reti jaku asal bekal ke udah diterangka orang ke tuai penemu dalam jaku Iban sereta dikena raban bansa Iban ari jeman aki ini kelia munya. Ukai ketegal kitai enda ulih ngerembaika reti nya ngagai reti ke bisi nyadi kemaya hari tu tang enti iya diguna baka nya bala nembiak ke belajarka jaku Iban udah enda nemu reti asal bekal dalam jaku Iban laban reti leka jaku bekal ke dikena kemaya hari tu nya datai ari jaku Melayu iya nya bekalan. Aku ukai enda besetuju enggau kitai nginjau reti sesebengkah leka jaku nya ari jaku Melayu tang kitai mesti berundingka reti asal leka jaku nya dalam jaku Iban sereta empas iya ngagai nembiak ke macha ayat kitai nya tadi kelebih agi sida nembiak rebak baru ke endang udah balat bendar nerima empas pemansang jaku bukai kelebih agi jaku Melayu. Siti ari empas negatif kitai ke suah bendar deka bekenaka leka jaku tauka reti leka jaku dalam jaku Melayu nya jemah ila nyangka orang ke mansik jaku baka raban linguistik kelebih agi ke mansik jaku Iban deka ngumbai jaku Iban nya semina siti ari dialek Melayu. Lebuh tu ila nyangka perintah deka mutuska jaku Iban nya enda ibuh agi diajar ba sekula laban iya sebagi ari dialek Melayu baka dialek Melayu Sarawak, dialek Melayu Kelantan, dialek Melayu Utara, dialek Melayu Brunei. Bah! Nama penyadi enggau jaku Iban maya nya ila? Ngagai kitai ke endang enda tentu angkunka jaku Iban taja pan kitai nya bebansa Iban, nadai ngachau, tetap nadai ngeruga pengidup kitai. Tang kitai bepenyalah nadai enggau orang kiruh betunggang lupung ngetanka jaku diri empu. Nya penyalah besai ngagai bansa diri.

Aku arapka kitai ke ba luar kandang sekula ke ngena jaku Iban dalam pengawa formal diri besehari-sehari tau mupuk berati sereta nyeliahka diri ari ngena leka jaku ke asal reti iya ari jaku Melayu. Anang kelalu gagit bekenaka jaku bukai ke tau ngujungka jaku kitai lenyau reti ti nemban sereta engkeman. Enti baka nya jaku kitai udah nadai bungas agi udah dipalit jaku bansa bukai. Tu ukai jaku rasis. Tu ba aku nya kena kitai sama-sama ingatka diri. Anang enda ingat, raban bansa Iban udah mayuh bendar lenyau reta tengkira ke mayuh ari sida empu enda nemu laban utai nya beseranyat lenyau lalu ukai lenyau enggau ngenyit; ambika banding baka kuasa politik, tanah adat asal, peluang pelajar tinggi, pengawa enggau mayuh ke bukai.