Tips Ngenataika Jaku Ba Mua Mayuh

Nyadi pekara ke deka dipekunsika aku enggau kitai sebuat sekali tu iya nya sentang tips ngenataika jaku ba mua mayuh. Tips tu bepelasarka peneleba masuk Kelab Toastmasters sereta suah dikangau orang meri jaku ba mua mayuh baik nya ngagai raban pemesai perintah, raban pengajar, bala nembiak ba palan pelajar tinggi enggau bala nembiak sekula.

Bejaku ba mua mayuh disebut public speaking ba jaku English, ba jaku Melayu baka ucapan, syarahan, pidato enggau ceramah tang ba jaku Iban suah agi disebut bejaku ba mua mayuh tauka ngelicha. Bejaku ba mua mayuh enda milih nya mayuh orang baka ba balai; iya tau mega semina ba mua raban empat lima iku orang tauka dalam sebuah kelas. Kitai ke deka bejaku ba mayuh tentu udah bisi besedia menggal mit tauka bisi peneleba ngenataika jaku ba mua mayuh tang bisi ati deka mantaika pekara nya enggau lanchar agi sereta betelipi. Nya alai sekali tu aku nguji bekunsi tips enggau kitai sebuat nyangka tau diguna jemah ila.

     1. Kurangka penyampau leka jaku ngagai 25 leka ba siti-siti slaid

Utai ke deka dibantai kitai ngagai bala mayuh enda tau ngundan lebih ari tiga batang pekara ngambika nyamai dikeingatka sida. Enti kitai ngena komputer – power point dia leka jaku kitai ba siti-siti slaid enda tau lebih ari 25 leka jaku. Kebuah pia ngambika orang ke mending kitai bejaku nya amat-amat mending lalu ukai macha teks ke dibantai kitai ba slaid.

      2. Anang berumban baban

Orang ke rawan seruran agi bejaku jampat kelebih agi ba mua orang mayuh. Kebuah pia laban iya deka ngabiska slot iya enggau jampat. Nyamai udah pia. Tang utai ke nyadi enda baka nya. Ba kitai ke ngenataika pekara nya amai mih laban kitai nemu nama utai ke disebut kitai tang enda ba orang ke mending kitai bejaku. Beri sida chukup awak dikena sida nerima utai ke dikenataika kitai ngagai sida. Nya alai enda ibuh berumban baban lebuh bejaku.

3. Anang minta ampun sereta madahka diri rawan

Dalam prinsip bejaku ba mua mayuh (public speaking), bejaku nya endang bekaul enggau gaya kitai ngenataika diri empu ba mua mayuh. Uji perundingka kita sentang pekara tu: nama penemu nuan semaka orang ke endang mayuh peneleba bejaku ba mua mayuh baka sida menteri besai/Obama/vice chancellor bediri lalu ngemunka jaku iya munyi tu, “Erm, aa aku minta ampun ari punjung pala ngagai ujung kaki. Aku enda tentu nemu sentang pekara tu. Erm, aku minta ampun, tak berasai kesal aku di jungkal kandang kamai, tak berasai rawan mimit bejaku ba mua kita. Enti kitai madahka diri kesal ati sereta rawan ba mua orang mayuh tentu orang ke ninga nya nadai pengarap ngagai kitai ke bejaku.

4. Enti udah tembu, badu

Bisi orang maya ke ngepunka jaku berasai tusah tang nama udah bejaku lalu enggai badu-badu sereta enda mudah deka ngelengkaka mikrofon.

Enti kitai udah chukup besedia, tentu kitai nemu nama pekara ti deka dikenataika kitai sereta pengelama kitai deka ngenataika jaku nya. Anang nunda orang politik bejaku, meniga jam enda chukup dikena sida bejaku. Suah teks ke disediaka kitai ke ngatur pengawa nya enda dibacha sida. Mayuh penemu ke limpang ari topik sereta balat agi bejaku pasal politik tauka ngangkatka diri empu.

Nya alai enti kitai udah tembu ngenataika pekara kitai tau mih kitai meri awak ngagai bala mayuh betanya saut enggau kitai. Udah nya duduk tauka terus minta diri pulai.

SIMPUL JAKU

Enggau sekeda tips ti dikenataika ditu, diarapka kitai kelebih agi bala nembiak sekula ulih nguji nunda sereta ngemeranka pekara tu lebuh bejaku ba mua orang mayuh baik nya enggau pangan diri lebuh ba kelas tauka kelab tauka lebuh dipinta orang bejaku ba rumah panjai lebuh bisi pengerami tauka ba sebarang endur enggau maya ti engkeman.