Lebuh bepedaka filem Melayu lama, kitai tentu beratika
meratika mayuh cherita enggau tirai pendiau ke nyadi kemaya nya iya nya maya filem
nya dikeluarka. Ambika chunto, enti iya dikeluarka maya taun 1950-an tauka
1960-an, mesti iya mandangka pendiau enggau endur maya nya mega.
Enti dalam filem, cherita nya nyeritaka gaya idup enggau ulah mensia mayuh. Kelimpah ari nya, iya mega ngambarka pendiau mensia mayuh maya filem nya dikeluarka, semadi mih iya mantaika cherita sejarah bemalinka penerang sejarah.
Enti filem nya nyeritaka sentang nembiak
ke beperindang ba kelab malam, nya reti iya endang amat nyadi maya nya. Ba
penemu mensia mayuh maya nya, sapa-sapa ke dikumbai ‘kaki’ kelab malam nya
endang masuk dalam raban ke rindu beperindang sereta ngabiska duit. Sida tu dikira
raban ke enda nemu utai tauka jai.
Kelab malam mega dikira tempat orang ngereja utai ke enda manah. Kelimpah ari kelab malam ke mengkang agi bisi nyentuk ke sehari tu, mayuh agi tempat mensia mayuh bebuaika jam enggau duit. Tu nyengkaum kelab pemerindang baka pub, pusat karaoke, dangdut, disko enggau ke bukai.
Filem mandangka realiti pengidup mensia mayuh
Enti dalam sesebuah filem deka mandangka jalai cherita chara mensia mayuh kemaya hari tu beperindang dia babak tempat baka ke udah disebut nya tadi nyadika tirai juru tauka setting iya. Enti kitai nerima fakta nya realiti mensia mayuh kemaya hari digambarka nengah sesebengkah filem, tu madahka pengirau mensia mayuh kelebih agi apai indai sentang gaya idup sesebengkah jeman nya lalu iya sigi bisi pengamat.
Maya taun 1950-an mensia mayuh maya nya nyalahka penatai moden nyadi pugu gaya idup berubah besereta ukur pendiau enggau etika komuniti. Kemaya hari tu mega apai indai mengkang nyalahka pemansang penatai moden. Bida iya moden taun 1950-an enggau moden kemaya hari tu endang jauh bebida baka langit enggau tanah.
Kelia, enti orang indu ngena skirt tauka gaun udah dikira gaya idup moden, tang kemaya hari tu orang ke begari bebuchai-buchai mega dikumbai gaya moden. Maya lelaki nyimpan buk panjai, sida dikumbai ngaga ubah ukur pendiau ti ekstrem ketegal kuing penemu enggau chara idup hippies. Kemaya hari tu indu ke dipeda debus-debus nginsap enggau ngirup ba pub nya dikira biasa sereta cool, laban kenu ku sida nya nitihka singkang pemansang jeman kemaya hari tang enti iya kelia menya nya dikira penyalah moral ke besai. Indu ke baka nya dikumbai sundal, jai sereta mayuh leka jaku negatif dikena ngambarka ulah sida nya. Nya suba, pia ku jaku.
Terang amat utai ke nyadi kemaya hari tu bisi mai penemu ti beserengkang entara nembiak rebak baru enggau orang tuai sereta apai indai enggau anak-anak. Anak ke beumur belasan taun ke enda agi nitih apai indai kin kitu nya dikira cool, tang iya ke agi nitih sida sebilik nya bejalai kin kitu dikumbai konservatif sereta tradisional.
Moden ukai reti iya mesti liberal
Runding tradisional suah dikira ‘rigid’ lalu enda nitihka ubah pemansang jeman. Enti iya tau disemaka baka sebuah televisyen nyangka nya mih ke dikumbai televisyen chelum burak. Ba sida ke bepikir chara moden, suah agi sida nerima fleksibiliti. Tikas bepikir chara moden enda datai ngagai tikas runding ti liberal, itah agi enti iya bisi kaul enggau pekara politik. Bepikir chara moden agi meri ruang ngagai ulah ti berunding chara bebatak asur, beberi ambi. Sida mega responsif sereta rasional dalam mayuh bengkah perkara ti dikira nyadi penyalah moral ba mata mensia mayuh.
Ambika chunto nya, sida ulih nerima fesyen baru ke tau dikira enda engkeman ba sekeda orang, baka nya mega ti bekaul enggau ulah ti dianggap belaban enggau ukur pendiau sereta norma budaya sesebengkah komuniti. Tang ba sida utai tu dikira cool. Bepikir moden mega bisi ngembuan pemanah kelebih agi ari aspek begunaka peluang. Ari bepikir chara moden mih pansut idea baru lalu ngasilka inovasyen enggau utai ke baru-baru ditengkebang.
Bepikir moden manah agi ari bepikir liberal. Kemaya hari tu mayuh amat nembiak rebak baru di Malaysia bepikir chara liberal. Sida tu suah agi ngaga utai ke belaban enggau adat asal enggau pengarap ke ba penemu sida nya pekara selama. Ba sukut politik, sida tu balat agi minta hak diri ke nadai besekat. Ketegal nya sida sanggup ngereja sebarang utai atas nama pekara ti nadai besekat.
Tiada ulasan:
Catat Ulasan