Panjai
amat topik kenang aku sekali tu. Ukai nama, laban deka bekunsi enggau raban
nembiak sekula sentang jaku dalam tu. Iya ga aruk, dipukung enggau alung; iya
ga pisa, tambah ga engkechung, iya ga labuh, ditinggang ga enggau lesung mai
reti tetemuka penusah bepanggung-panggung.
Siti
ari chunto jaku dalam tu tau dikena ba utai ke benung nyadi kemaya hari tu. Utai
ke ku aku nya bekaul enggau kompeni penerebai bilun Malaysia ke tebilang agi
dikumbai MAS betapi enggau mayuh penusah. Kitai sama bela nemu apin lama ke
udah kena 17 haribulan Tujuh 2014, sebuah bilun MAS MH17 udah terempas labuh ba
menua Ukraine ketegal ditimbak ngena peluru bepandu. Bilun nya Boeing 777-200ER
mai 283 iku penumpang ari 10 buah menua sereta 15 iku anak kapal. Iya benung
terebai ari Amsterdam ke Kuala Lumpur lebuh ke terempas ba timur Ukraine.
Sebedau
tu kena 8 haribulan Tiga 2014 MH370 ti ditaga bekejang ari Kuala Lumpur ke
Beijing, China diripot lenyau maya jam pukul 1:20 pagi lebuh pejalai iya enda
agi ayan ba radar. Bilun nya bisi ngundan 227 iku penumpang ari 15 buah bengkah
menua di dunya sereta 12 iku anak kapal. Perintah begulai enggau perintah menua
bukai kelebih agi Australia enggau naka ulih ngiga alai pengelabuh bilun tu. Sepengelama
tiga bulan Malaysia enggau bantu ari menua bukai berundang kasang sereta
betunggang lupung begigaka bilun tu ke lalu enda temu nyentuk ngagai sehari tu.
Menteri Besai Malaysia lebuh bejaku ngagai pengarang berita madahka bilun nya
ngapuska pejalai iya tasik besai Hindi.
Sebedau kedua-dua penusah tu nyadi, MAS mega
benung napi penanggul ekonomi. Prestasi pejalai MAS ungkup suku kedua 2014 mandangka
bisi nurun ari faktor barang ke dibai bagi penerebai antarabangsa iya nya
kira-kira 6.3 peratus mata maya bulan Tiga tu tadi. Kompeni penerebai bilun tu
udah rugi dalam aspek bejualka tiket lebuh sida empu narit diri ari Pemandang
Dagang Gerempung Ejen-Ejen Temuai Malaysia (Matta), ke lalu mega nyadi kaban ti
bejualka tiket MAS. Nitihka ripot MAS udah rugi RM473 juta ba suku keterubah 2014.
Kelimpah ari nya, MAS mega napi penanggul mayar
pampas ngagai kaban belayan penumpang MH370 enggau iya ke baru tu MH17. MAS nitihka berita udah ngagihka AS$50,000
duit pampas ngagai tiap-tiap iku waris penumpang peranak menua China, iya nya
pampaske dulu sebedau maya ke laluh ari nya.
Utai
ke dikenang ditu nya penusah ke bepanggung-panggung ti ditapi kompeni penerebai
bilun MAS tu disempamaka baka jaku dalam iya ga aruk, dipukung enggau alung;
iya ga pisa, tambah ga engkechung, iya ga labuh, ditinggang ga lesung. Kitai sama
bela nemu kompeni penerebai bilun MAS tu endang diempu perintah reti nya duit
puku nya datai ari chukai ke dibayar kitai rayat menua Malaysia. Nya alai
nama-nama penusah ke nyadi ngagai kompeni tu enggai enda enggai endang bisi
besangkut paut enggau kitai ke nyadi peranak menua Malaysia.
Tiada ulasan:
Catat Ulasan