Lebuh Brazil
alah jamah Jerman 7-1, aku meri komen ngagai tawing aku munyi tu, “ada ku kesah”.
Bisi mendua kali aku munyi nya, nyangka iya nyau enda liat lalu madah aku tu kaki
bangku, enda nemu pemansang utai ke nyadi, enda ulih kelalu pasif, nadai dikemuningka
orang. Ninga tak balat bendar komen iya senentang aku dia aku nimbal iya
madahka ukai aku pasif lalu enda nemu pemansang pemain orang tang aku enda
peduli laban aku enda alah betui. Aku madah ngagai iya aku tu suba endang
pemain bol, kala ngarika sekula ngelaban SK Munggu Beringin (hahaha), kala
mega bemain ngarika team aku ba sekula sekondari, ba genturung pendiau aku diau lalu
ba kolej alai aku belajar. Tang nya suba, maya agi regas, agi dapat ku jaku
orang tuai. Nya mih enti orang enda nemui tirai pengidup kitai enggau lenak
sigi sepeneka meri komen. Anang pia wai.
Nya alai
kesekali tu aku enggai enda enggau orang ngeruh ai bejaku pasal pekit main
berebutka Mangkuk Dunya ke nyau datai ba tikas pengujung. Ari utai ke didinga
ari radio, dipeda ari televisyen enggau dibacha baik nya ari media sosial ba
laman web tauka ari surat berita, dia aku sekali tu ngukun penemu ngaga
analisis lalu meri simpul nundaka penemu diri. Enti bisi besibil penemu enggau
enggi kita nya ukai ketegal ari kedeka ati ukai ketegal senaja tang semina nya
mih penemu ke bisi ba aku. Tu munyi simpul penemu aku.
Tukang latih
Jerman, Joachim Loew diperatika aku endang meri fokus penuh ngagai team iya
lalu fokus iya nya enda kala surut kenyau ari iya matih sida nyentukka
ngenataika diri ba tanah Brazil, iya nya deka menang Mangkuk Dunya 2014.
Tudah tuai
mula diperatika orang mayuh sepengudah gambar iya ke ngena gari mandi,
becheremin mata chelum sereta bejalai kaki ayam kediri-diri ba tebing tasik baru-baru
tu. Taja ulah iya baka nya tang iya mujur ngubah perati dunya lebuh team ke
dipegai iya manah sereta semina tinggal sesingkang da agi deka nyapai trofi
Mangkuk Dunya.
Pia mega
manuk sabung ari Amerika Selatan iya nya Argentina bela nyimpan juluk ati ke
sama. Enti iya puntan mai gelar dunya dia Leow nyangka nerima pejah ari
peminat, enggau menua iya empu. Tang nitihka ari bacha aku, Leow tu tetap
optimis enggau pengulih team iya serak tu. Leow tetap madah iya enda kena tekan
kelebih agi lebuh ditanya kapten team Jerman ke suba iya nya, Oliver Khan lebuh
iya berandau ba program di televisyen Jerman sebedau bepun kimpin Mangkuk
Dunya.
Leow
mega sama-sama enggau Gerempung Main Bol Jerman endang bejimat lebuh nyendiaka
raban pemain ngambika enda kena tekan ke tau bendar ngeruga chara sida bemain. Ku
iya semua kaki jari tukang latih enggau raban pemain iya endang enda macha
surat berita kenyau ari sida ke datai ba Brazil. Ku iya sida semina meri fokus
deka menang aja lalu ukai ngiga chara baka ni deka nyeliahka diri ari alah
jamah team bukai.
Pejah senentang
team Jerman lebuh menang mimit ngelaban Algeria (2-1) bisi ngasuh ati iya
nyima, bisi bendar ngasuh iya ‘naik angin’. Munyi ku iya, patut tauka enda iya
berasai sinu ketegal team iya menang ba tikas semi-final? Leow munyi ke nanya
pulai jaku pejah orang senentang pekara nya.
Leow sigi
dikira tukang latih Jerman ke pengabis mujur dalam timpuh 30 taun ke udah. Tu bepelasarka
rekod 76 kali menang sereta 15 kali alah dalam 111 kali main.
Nya alai
enti diperatika ari penyuah kedua-dua team tu menang dia kitai meda Jerman udah
tiga kali menang mangkuk tu, iya nya dalam taun 1954, 1974, enggau 1990 lalu Argentina udah dua kali
menang, iya nya dalam taun 1978 enggau 1986. Team Jerman diperatika team ke
ngemeratka sukung enggau tulung ari pangan diri lalu Argentina balat agi
bepanggai ba siku-dua pemain kelebih agi baka Lionel Messi. Kenu ku jaku tuai,
tuah manuk nyerupa di kaki; tang tuah mensia sapa mereti. Sama-sama kitai
nyukung team ke dikerinduka ati kitai mih.
Tiada ulasan:
Catat Ulasan