Pantuk Belalang Ulih Tipang, Pantuk Jaku Enda Nemu Badu

Gembar ias

Kenu ku orang, enti kitai seruran ngerut sabut puting enteran, lama laun tulihka dengah; pia mega enti kitai seruran belangkau ba pala kerangan lama laun pan diampuhka bah. Jaku dalam tu bisi kaul enggau pekara ti deka dikenangka aku sekali tu. Pelaba aku mayuh udah raban pemacha nemu pekara tu ke bisi kaul enggau pekit main bol dunya ke nyau deka datai ba pengujung.

Tu ngenangka siku pengari rayat ke chebur-chebur bejaku tauka bejaku tak sepeneka mansut enda ngiraka pengasai ati orang ke macha tauka ninga. Pekara tu bepun ari team menua Jerman ke menang besai lebuh sida ngalahka team ke beberita mega, iya nya team Brazil. Ajuh tu ngemunka kontroversi lebuh iya ngaitka team Jerman ke ngalahka Brazil 7-1 ba tikas semi-final pekit main bol Mangkuk Dunya 2014 tumu pagi kensana enggau Adolf Hitler.

Ketegal nya Duta Jerman di Malaysia, Holger Michael madahka twit Kaban Parlimen Kinabatangan ke muji Adolf Hitler sepengudah team Jerman ngalahka Brazil nya ‘enda masuk akal’. Nitihka ripot AFP, Michael madahka jaku sema ti baka nya endang enda ulih diterima. Iya madahka rayat menua Jerman bebasaka jaku puji iya ngagai team main bol Jerman, tang sida enda nerima jaku iya ke ngaitka pekara nya enggau rejim fasis Adolf Hitler”. Di menua Jerman empu sapa orang ke agi besebut sereta muji Hitler tau kena tinggang ukum. Twit Bung Mokhtar mega nerima timbal jaku ke negatif ari penguna Twitter ke bukai.

Tang baka selama iya nyakal orang ke mejah seruri jaku iya nya. Ketegal jaku iya nya dia Menteri Besai, Datuk Seri Najib Tun Razak madahka twit ke ditulis Kaban Parlimen nya “enda ulih diterima sereta salah”. Penerang Najib senentang pekara nya bisi dipunggah ke akaun rasmi Twitter enggau Facebook iya. Iya mega madahka Bung Mokhtar ukai bejaku ngarika Malaysia enggau rayat Malaysia ke meretika maya sejarah Eropah kelia ke penuh enggau trajis. Nitihka sejarah, Hitler nyadi tuai Nazi antara taun 1933 nyentuk ke 1945 lalu iya ke betanggung pengawa munuh bejuta-juta orang Yahudi maya Perang Dunya Kedua.

Komen iya mega enda dikerinduka mayuh penguna Twitter ke bukai. Sida ngasaika komen iya nya nyereminka tikas pikir iya empu. .

Nyadi Bung Mokhtar tu udah nyadi kaban parlimen kenyau ari taun 1999. Tu ukai kali keterubah iya ngundang kontroversi. Sebedau tu iya kala dipejah ketegal ngaga penerang ke kurang sensitif senentang indu, beripih bansa sereta sekeda hal bukai. Pemansut jaku iya suah ngayan ke ulah ke enda setipak enggau status iya ke nyadi pengari rayat. Enti di rumah panjai orang ke bejaku baka tu tau ditunggu, diparas mulut iya laban jaku baka nya tau nyimaka ati orang ke ninga. Sigi amat ku orang, liur ti udah diludah enda ulih dilat agi. Enti baka pantuk belalang nyamai mih agi ulih ditipang tang enti pantuk jaku sigi empas iya enda nemu badu.