Bidang, Midang enggau Pemidang

Nyadika sekali tu aku nguji bekunsi penemu enggau bala pemacha senentang leka jaku ke seruran ayan ba sekeda artikel ke dibacha aku. Leka jaku ke dikena ba ayat nya bisi ngaru ati aku ke macha nya. Nya alai kesekali tu aku deka meri penemu diri senentang leka jaku nya. Penemu ke dikenatai aku ditu ukai reti nya betul, nemban sereta engkeman ba ati pemacha tang semina nyadika buah kenang aku. Enti kita besetuju enggau penemu aku nya aku terima kasih ngagai kita, enti kita enda besetuju enggau penemu aku nya mega aku nerima iya nyadika malin aku jemah ila.

Kebuah aku ke mansutka penemu senentang leka jaku tu laban aku bisi bendar pengirau ati ngagai bala nembiak ke belajarka jaku Iban di sekula. Sida tu agi pandak runding sereta mudah tepejuh enggau penemu bukai kelebih penemu ari luar kandang sekula. Ari nya sida mudah niru lalu nunda nama-nama leka jaku ke suah dipeda iya ayan ba bup tauka surat berita ke luar ari kandang sekula. Aku ke bekunsi tu ukai madahka penemu luar nya salah tang iya ke dikena ba sekula endang meruan bisi sistem iya empu bepelasarka bup Sistem Jaku Iban Di Sekula ti dikeluarka Opis Menteri Pelajar.

Leka jaku ke suah dipeda aku dikena ba sesebengkah artikel nya leka jaku pemidang. Sebedau aku meri penemu diri senentang leka jaku pemidang nya dulu aku mai kitai meratika leka jaku ke ba aku bisi kaul tauka engkabih mimit enggau leka jaku pemidang.  Leka jaku nya bidang enggau midang.

Bidang tu bisi dua iti reti. Reti ti keterubah nya pengawa nyarik tauka melah utai ti besai-besai baka kain, tikai tauka utai ke sebaka enggau nya. Lalu reti bidang ti kedua nya leka jaku pengenap tesa kena ngitung tanah, kain enggau ti bukai. Ambika chunto, apai Mangkau meli tiga bidang tanah ba Nanga Sekalit.  

Lalu leka jaku midang mega ngembuan dua iti reti. Reti ti keterubah leka jaku midang nya lenyau, enda temu tunga endur. Lalu reti midang ti kedua nya parai tauka mati. Midang ke dikena ba leka jaku parai tauka mati nya dipasuk dalam kategori jaku kelaung, tauka dikena raban bansa Iban ngelaung nyebut leka jaku parai tauka mati. Kerembai ari reti midang tu mega reti iya mindah. Ambika banding baka manyi midang alai reti nya ngiga endur ngagai sarang baru. Maya bisi orang mati, iya dikesema baka manyi midang iya nya mindah ngagai menua baru.

Ba leka jaku pemidang tu nadai udah meda leka jaku enggau reti nya bisi pansut ba kamus ke dikeluarka Anthony Richards, Sutlive, DBP enggau Yayasan Tun Jugah dalam bup Serbareti. Nya alai ba penemu aku leka jaku pemidang nya sigi ukai madahka reti pemati tauka pemarai, semadi mih kitai ngumbai nya sebaka. Dalam konsep asal jaku Iban reti nya leka jaku midang enda ulih diberi penambah pe- ba mua leka jaku nya. Jaku Iban ba penemu aku endang bisi lebas enda ulih disemaka enggau jaku bukai lalu enda tentu ulih nitihka teori linguistik. Ukai semua leka jaku nya ulih diberi penambah. Enti diberi munyi iya tetap nyelai.

Ba jaku Iban ke dikena ba sekula dia penemu Profesor Dato’ Asmah Haji Omar (1995) dalam keretas kereja iya “Pandangan Terhadap Sistem Ejaan Bahasa Iban ke disediaka Dayak Cultural Foudation nyadika pelasar lebuh ngaga sistem sepil lalu iya bisi menatika 5 kriteria. Siti ari lima kriteria nya dikumbai Penulin.   Kriteria tu madahka sistem sepil jaku Iban di sekula tu ngembuan tukuh penulin kediri empu ti mandangka jaku Iban endang ngembuan chuan diri lalu ukai beduduk ari chuan jaku bukai. Taja pia, chuan sistem sepil jaku Iban enggau jaku Melayu bisi bekabih ketegal kedua-dua jaku tu ti sebilik dalam jaku seperugan. Ari sukut prinsip lingusitik, jaku Iban mega bisi lebas. Nitihka prinsip linguistik nya, pengentap sistem sepil jaku Iban enda ulih beduduk penuh ari prinsip tu ketegal ti bisi ngembuan pengaya jaku enggau penyelai enti dibandingka enggau jaku bansa bukai.