Panyun
Jaku
Karang
sekali tu nguji ngenang senentang pemansang jaku Iban ba sukut akademik kelebih
agi ke dikena ngajar enggau belajar jaku Iban ba tikas primari, sekondari,
institut pematih pengajar enggau universiti. Karang kenang tu ditengkebang ari
perati penulis senentang pemansang jaku tu sereta ari jaku randau bala pangan
ke mega bebansa Iban kelebih agi sida ke regas dalam pengawa ngajar jaku Iban
enggau bala tawing bukai ke mega bisi mekuh pengawa ti bekaul enggau jaku tu
sereta bala Iban bukai ke selalu besebutka jaku Iban ba laman sosial.
Penemu
ti dipansut ditu endang ari penemu penulis empu sereta ari peneleba enggau
perati ba pengawa pemansang jaku tu di
sekula, ari jaku pejah bala Iban bukai baik nya ba laman sosial tauka maya ke
bisi ninga sida berandau enggau pangan diri di opis, kedai kupi enggau endur ke
suah matak orang mayuh begulu ketegal bisi pengawa.
Lansa
Sejarah Pemansang jaku Iban di Sekula
Jaku
Iban berengkah diambi nyadi jaku dikena ba sukut akademik ba sekula di
Sarawak maya iya berengkah dikena ngajar
enggau belajar ba sekula. Reti nya jaku Iban keterubah iya dikena ngajar enggau
belajar ba sekula mission St. Paul, Banting dalam taun 1853. Udah nya iya
ngerembai ngagai sekula bukai baka sekula St. Francis, Kanowit (1884), St.
Luke, Simanggang (1893), St. Augustine, Betong (1920), St. Margaret, Betong
(1922), St. Peter, Saratok (1925), St. Paul, Roban (1925) enggau St.
Christopher, Debak (1925). Rambau tu jaku Iban dikena ngajar enggau belajarka
semua mata pelajar di sekula.
Ba
sekula primari, jaku Iban berengkah dipelajarka berengkah ari taun 1853 tang ba
sekula sekondari iya dipelabaka berengkah dipelajar sechara formal dalam taun
1953. Peresa jaku Iban ba tikas Sarawak Junior Certificate (SJC) tauka tikas
pom tiga keterubah dalam taun 1955. Keretas jaku Iban maya nya disebut Asian
Language. Udah nya dalam taun 1957, ba peresa SJC nama keretas tu lalu diubah
ngagai Sea Dayak. Setaun udah nya, iya nya dalam taun 1958, nama keretas tu sekali
agi diubah ngagai Iban Language.
Kelimpah
ari nya mega, jaku Iban ngerembai ngagai guna jaku ke dikena ngajar enggau
belajar nengah radio. Jaku tu berengkah ditaburka ari radio dalam taun 1963 ba
siti slot ke dikumbai School Broadcasting Service.
Nangkanka
nya, dalam taun 1964, turai pelajar jaku Iban sekula sekondari baruh bisi
dikeluarka perintah Sarawak baruh nama ‘The Curricular and Syllabuses for
Junior Schools’ lebuh iya udah dikemendarka begulai enggau turai pelajar subjek
bukai dalam ‘Sessional Paper No. 3’. Dalam kurikulum nya, jaku Iban semina
diajar ngagai nembiak bansa Iban aja. Turai pelajar jaku Iban tu majak dikena
datai ngagai taun 1984. Keretas peresa kepenudi bemalinka turai tu iya nya
keretas peresa Lower Certificate of Education (LCE) dalam taun nya mega.
Taja
pan jaku Iban tu bisi diajar ari taun 1963 nyentuk ke 1985 tang utai ke nadai
ditemu nya senentang pun kuasa ke ngasuh jaku nya diajar ba sekula. Kebuah pia, laban maya Akta Pelajaran 1961
dikerembai ke Sarawak dalam taun 1976 dia jaku Iban enda dipasukka nyadi siti
mata pelajar di sekula. Ari sukut
undang-undang, pekara tu enda betul laban nadai pemendar. Tang lebuh mensia
mayuh nanya kebuah iya agi majak diajar ba sekula laban iya sigi bisi udah
diajar kenyau ari jeman Rajah Brooke, reti nya iya diajar ketegal status quo.
Lebuh
kurikulum nasional bisi berubah dalam taun 1988 dia jaku Iban kiraka bisi
enseput mimit. Opis pelajar menua bisi
ngeluarka surat kuasa dikena ngajar jaku Iban ba sekula primari. Berindik ari
nya kurikulum baru ti bechuanka kurikulum nasional berengkah digaga. Nangkanka
nya mega surat kuasa ngemendar ngajar jaku Iban ba sekula sekondari baruh
dikeluarka dalam 1988 lalu ba sekondari atas dalam taun 2004.
Kenyau
ari nya mih jaku Iban majak mansang-semansang, majak ngerembai-sengerembai.
Penyampau nembiak ke belajar jaku tu ulih dipeda ari sida ke ngambi peresa
tikas PMR. Ari 75 iku dalam taun 1985 datai ngagai 5000 lebih dalam taun 2006.
Ba tikas peresa SPM jaku Iban berengkah diperesa dalam taun 2008. Ketegal ke bisi nembiak ngambi jaku Iban ba
tikas SPM dia bala tuai Iban enggau bala ke mekuh pengawa pasal jaku Iban tu ba
opis pelajar berunding ngangkatka jaku tu datai ngagai institut pelajar tinggi
baka institut pematih pengajar (IPG) enggau universiti. Nya alai ketegal ari
peminta raban bansa Iban dia jaku tu diatu bisi diajar ba IPG Rajang ba tikas
program pra berengkah ari taun 2011 lalu ba tikas degree ba taun 2013 enggau
Universiti Pendidikan Sultan Idris (UPSI)
berengkah Julai 2010. Kelimpah ari nya jaku Iban Komunikasyen mega bisi
diajar ba Universiti Malaysia Sarawak (UNIMAS).
Pemansang
kemaya hari tu
Belalauka
pemansang tu, jaku Iban endang jauh bendar nyulut ari jaku etnik bukai ke bisi
di Sarawak. Mata pelajar jaku Iban udah sebaris enggau mata pelajar bukai
kelebih agi ba tikas nasional. Jaku Iban udah sebaris enggau jaku China, Tamil,
Punjabi enggau Kadazandusun. Raban bansa Iban endang patut temegah enggau
pemansang tu tang anang alit enti pemansang tu tau puntan baka menasan jalai
jelu.
Nama
kebuah jaku Iban ba sukut akademik agi kalik-kalik?
Penyampau
ke ngambi majak kurang-sekurang enti diperatika ari penyampau nembiak ke ngambi
peresa baik nya ba tikas PMR sekalika SPM. Enti diperatika enggau ngelansa
ninting taun ba tikas PMR subjek Iban kurang 200-300 iku calon. Baka nya mega
ba tikas SPM. Nitihka jaku sida ke gawa ba Opis Pelajar Nengeri Sarawak, taun
2014 tu kurang agi nembiak ke ngambi SPM jaku Iban laban ke pemutus peresa taun
2013 ke enda manah. Ari berita ke ngerimbas pending penulis bisi nya sekula
semina 10 iku aja ngambi, bisi nya 7 aja taja pan ba tugung ke mayuh nembiak
Iban.
Mayuh
prinsipal sekula ngambi jalai likun enda ngasuh nembiak ngambi mata pelajar
jaku Iban taun 2014 enggai pemutus peresa sekula sida dirampit jai ketegal jaku
Iban. Pekara tu endang disebut prinsipal empu enggau jaku lalau ari Pengelalau
Pengatur Sekula (SIP+). Kenu ku sida mata pelajar jaku Iban tu mih ke
ngelabuhka nama sekula ba ranking pemanah entara sekula. Kemaya hari tu mensia
mayuh baik nya pemesai opis pelajar, kepala pengajar, sekula, apai indai enggau
komuniti balat agi ngemeratka pemutus peresa ti manah ari ke ngulihka penemu. Sida
enda ulih nerima nembiak ke enda mujur laban nya tau mai penyai ngagai imej
sekula, pelilih menua enggau menua Sarawak tu empu. Mata pelajar jaku Iban
laban ke bestatus mata pelajar jaku tambah ba tikas PMR enggau elektif ba tikas
SPM nadai peluang mansang enti majak digaga baka tu.
Kelimpah
ari nya mega ba sekeda sekula, nembiak ke pandai ba pelajar sains enda diasuh
ngambi ketegal dalih ke sama. Sida pengatur sekula mega takut nembiak ke ngambi
jaku Iban enda bulih A dalam semua subjek ke diambi iya. Pekara tu ku sida
semina nyadi ba mata jaku Iban aja. Amat tauka enda nya sama-sama kitai
beratika diri. Kala kitai merati nembiak bukai ke enda bulih semua A ketegal siti
dua subjek bukai? Kala tauka enda kitai mansik pekara tu? Sekeda prinsipal malu
laban nembiak ke enda bulih A ba semua subjek nya ketegal jaku Iban. Sigi amat
sereta endang patut malu tang nyebut semua nembiak enda bulih semua A ketegal
jaku Iban nya penerang ke berat sereta patut disempulang enggau evidens sereta pansik ukai semina ba mata
pelajar jaku Iban tang semua subjek bukai mega ngambika iya valid agi.
Munyi
ke udah disebut ari pun tadi penyampau orang ke ngambi pelajar jaku Iban tu
ulih dipeda enggau nyata bendar ari penyampau sida ke ngambi peresa keretas
jaku Iban ba tikas pom tiga enggau lima. Nitihka berita ke dikunsi ari sida ke
mekuh pengawa tu dia sida madah penyampau sida ke ngambika mata pelajar jaku
Iban tu majak kurang-sekurang ari taun ke taun baik nya ba pom tiga tauka pom
lima.
Bisi
sekula udah nutup kelas jaku Iban
Bisi
beberapa buah sekula udah nutup kelas jaku Iban ketegal nadai pengajar ngajar
mata pelajar tu. Empas ari pekara tu; dia tusah alai sida ke deka muka kelas tu
jemah ila laban sida mesti nengah atur lebuh minta kelas tu dibuka enti bisi
peminta ari nembiak jemah ila. Kitai sama nemu, pengawa ke deka ngemendarka
sesebengkah pekara ulih agensi perintah ngambi awak ti panjai kelebih agi enti
kitai enda ituk nanya tauka nadai orang ke berani sereta bisi kuasa.
Nadai
pengajar jaku Iban
Ba
sekeda sekula ke mayuh tugung bansa Iban tauka ba sekeda ke bisi nya ngembuan
penanggul nadai pengajar jaku Iban. Nembiak bisi deka ngambi tang pengajar
bangat nadai alai sida bediri belajarka jaku Iban.
Nadai
chukup pengajar jaku Iban
Nadai
pengajar jaku Iban enggau nadai chukup pengajar jaku Iban nya dua isu ke bebida
taja pan ari sukut penanggul ke sama. Bisi mega sekeda sekula nadai chukup
pengajar ke ngajar jaku Iban. Nembiak kelalu mayuh ke deka ngambi tang sekula
semina ulih nerima mimit aja. Sekula baka tu semina milih nembiak ke dekaka
sida aja tauka sida endang bisi chara sida empu milih nembiak masuk kelas sida.
Sida ke bukai nya semina peli-peli meda bala pangan sida ngambi pelajar nya. Hak
nembiak ke deka ngambi mata pelajar jaku Iban udah puntang ketegal penanggul
tu.
Pengajar
jaku Iban milih nembiak
Kebuah
tu nyau deka sebaka enggau ke di atas tadi. Nyangka ketegal kelalu mayuh tugung
nembiak alai pengajar nyau napis nembiak ke deka masuk kelas iya nya. Enti baka
tu sigi bisi jalai pemansang jaku Iban tau tengat tau mega puntan. Bisi sekeda
pengajar semina deka ngetanka kualiti diri lalu semina ngambi nembiak ke
dikarapka iya bulih A dalam jaku Iban aja diambi. Tang kadang-kadang nasit
nembiak ukai semina ditentuka ulih pengajar ke milih nembiak nya laban bisi
maya nembiak ke dikarapka bulih A enda bulih.
Faktor enda bulih nya mayuh tang pengajar suah agi nyalahka orang bukai
tauka sistem ke enda manah. Dudi agi sida madahka pengurang diri, sekula enggau
nembiak. Tu ngujungka taun siti nembiak ba sekula tu majak kurang ngambi jaku
Iban.
Kepala
pengajar enda ngasuh
Kemaya
ari tu pengulih enggau pemujur kepala pengajar megai sesebengkah balat bendar
bepanggai ba pemujur pemutus peresa perintah baka UPSR, PMR enggau SPM. Sekula
ke balat bendar nyulut deka nerima mata duit ari perintah kelebih agi ngagai
kepala pengajar enggau sekeda bala pengajar. Mayuh macham chara dikena nyapaika
juluk ati tu munyi jaku Melayu; objektif menghalaikan cara. Ketegal nya subjek
baka jaku Iban ba taun enam bisi enda diajar tauka jarang diajar laban deka
meri peluang ngagai subjek berat baka Bahasa Melayu, English, Matematik enggau
Sains diajar enggau chakah agi ngambika bisi peluang bulih pemujur dalam peresa
UPSR. Baka nya mega ba tikas sekondari. Kepala pengajar selalu mutuska subjek
baka jaku Iban tu ukai subjek ke berat ke patut diambi nembiak kelebih agi ba
tikas SPM. Ke bendar sida tu semina dekaka pemutus sekula ti manah ari ke
ngajar jaku Iban ke nadai mai penguntung nya. Munyi ku kepala pengajar, “aku
mesti ngiraka aku empu”. Bah baka ni enti iya udah munyi tu? Kati enti iya ke
nyebut tu pan siku ari orang ke bebansa Iban?
Diajar
ba luar sidang
Ketegal
ari surat kuasa ke madah pelajar jaku Iban diajar ba luar sidang ngujung mayuh
nembiak enggau pengajar empu nadai pengerindu deka belajar enggau ngajar jaku
tu. Taja pia iya balat bendar bepanggai ba pengatur sekula kelebih agi kepala
pengajar enggau penyampau nembiak ke ngambi pelajar tu. Ba sekeda endur tu ukai
nyadika penanggul laban jaku Iban diajar ba dalam sidang. Pemulai sida ke
ngambi pelajar tu sebaka enggau nembiak bukai. Nembiak ke diajar ba dalam
sidang ransing agi belajar laban sida bela pulai sama maya enggau nembiak
bukai.
Persepsyen
bala kepala pengajar, pengajar enggau nembiak
Persepsyen
bala kepala pengajar, pengajar enggau nembiak ngagai mata pelajar jaku Iban
mega nyukung kebuah jaku Iban tu agi kalik-kalik. Sekeda ari sida tu ngumbai
jaku Iban pedis tauka mar dipelajar. Jaku Iban tu jaku orang Saratok aja laban
mayuh orang ke bejaku ngeringka jaku Iban tu maya seminar semua orang Saratok.
Jaku sida semina sida aja nemu. Pia? Enti peresa pedis amat deka bulih A.
Subjek bukai semua A semina jaku Iban aja ukai. Baka ni deka ngasuh nembiak ngambi
pelajar jaku Iban tu? Sekula malu, kepala pengajar malu enggau bala pengajar
pan dirampit malu ketegal nya. Utai ke nadai ditemu tauka enggai ditemuka kitai
nya enti penyampau nembiak mimit tentu mimit agi mega bulih A.
Kala tauka enda
kitai meratika penyampau nembiak ke ngembi keretas Bahasa Melayu (BM) enggau
Jaku Iban? Engggi BM ninting taun bisi 400,000 lebih nembiak ngambi lalu ba
keretas Iban semina 1000 lebih. Baka ni pemutus iya tau mayuh enti penyampau
iya mimit? Ngagai sida ke suah ngaga pansik tentu nemu teori penyampau sampling
bisi mai empas ngagai pemutus pansik sida. Kati enti semua nembiak ke ngambi
nya bulih A memagang? Reti nya keretas peresa nya kelalu mudah lalu enti baka
nya nadai guna bisi peresa. Tuju peresa nya deka nisih nembiak ke pandai enggau
enda.
Nadai
sukung ari apai indai
Apai
indai nadai tentu nyukung anak sida ke ngambi pelajar jaku Iban. Ambika banding
ba siti sekula alai mayuh bala apai indai laban mayuh ari sida ke gawa ba
industri minyak enggau gas enda tentu ngasuh anak sida ngambi laban ku sida
pelajar jaku Iban suah diajar ba luar sidang lalu sida nadai hari deka ngambi
anak sida pulai. Nya alai bisi didinga
ngerimbas pending sekula tu deka nutup kelas sida ba tikas SPM.
Atur
milih orang masuk ngambi pengawa ti bisi kaul enggau jaku Iban
Tu
siti agi kebuah jaku Iban ba sukut akademik agi kalik-kalik. Suah bendar kitai
ninga sekeda orang serebana lebuh enda mujur bulih pengawa tauka belajar ba
bidang ti bisi kaul enggau jaku Iban. Ambika banding, orang ke gawa ba radio
ukai reti iya mesti bisi ngambi peresa dalam jaku Iban. Sida ke ngatur orang ke
ngambi mega kekadang ukai orang Iban empu. Baka nya mega utai ke nyadi ba
institut pelajar tinggi. Bisi serebana
madah bulih A dalam jaku Iban tang enda mega ulih masuk institut pelajar tinggi
dalam bidang jaku Iban. Ba pekara tu kitai patut ngira iya ke nyadi isu nya
penuduk ke mimit alai nembiak nya nyau berumpak baru berebut enggau pangan
diri. Tu tau mai empas ngagai nembiak di sekula. Ku sida nadai guna ngambi jaku
Iban enti enda ulih masuk IPG nyadi pengajar jaku Iban.
Jaku
Iban nadai rega komersial
Mayuh
pengajar enggau apai indai bansa Iban nadai pengarap ngagai jaku Iban. Ba sida
jaku Iban tu nadai mai penguntung ekonomi ngagai anak sida, semuti ta
ngerandaka diri ngambi pelajar tu. Ngagai raban pengajar mega sida ngasaika
ngajar jaku Iban tu muai awak sida. Manah agi awak ke bisi dikena sida bejual
insurans, bejual barang terus tauka bekebun sawit sereta ngasu beburu. Bisi
orang nguji madah ngagai sida tu jaku Iban bisi dikena ba lagu. Nemu kita nama
saut sida? Bah berapa iku ke ulih nyadi penyanyi lagu Iban? Berapa iku ulih
nengkebang lagu dalam jaku Iban? Enti bisi pan ni naka pengulih sida dih? Nadai
udah ninga penyanyi Iban kaya ketegal belagu dalam jaku Iban. Sigi amat jaku
apai indai nya tang kitai tentu bisi chara ngasuh iya tau mai penguntung komersial
enti kitai bisi terundingka chara ti engkeman.
Mekuh
pengawa bekaul enggau jaku Iban nadai glamer
Tu
baru didinga penulis. Enda nemu tu bisi pengamat tauka nadai. Bisi orang minta
pengawa ke bisi kaul enggau jaku Iban tang lebuh udah bulih lalu ngalih ngagai
pengawa bukai. Reti nya pengawa tu tadi semina nyadi batu alai iya engkechit
ngagai pengawa bukai ke glamer agi. Pengawa ke bekaul enggau jaku Iban nya tadi
lalu ditinggalka tauka kurang dikibuh.
Nadai
pengawa ari belajarka jaku Iban
Dalih
tu sama enggau ke di atas. Nama pengawa ke ulih aku ari ke belajarka jaku Iban?
Enti lembau berunding sigi nadai mih saut ti nemban. Tang uji kitai ngira
belajarka jaku Iban ukai semina ketegal pengawa tang siti ari tuju nya deka
neruska waris pesaka Iban ngambi enda lenyau, enda retai. Pengawa sigi bisi
tang nyangka enda mayuh, ambika banding baka sida ke gawa ba opis penerang,
opis radio, opis surat kabar, opis pelajar, court sereta enggau pengawa
pemerindang.
Nadai
sukung ari gerempung ukai kuasa perintah (NGO)
Gerempung
ukai kuasa perintah ti bisi besangkut-paut enggau bansa Iban sigi bisi baka Yayasan
Tun Jugah, Majlis Adat Istiadat Sarawak, SADIA, SIDS, SDGA, SDNU, SIRA, SIWA,
AEDIL, DAMA. Nya rintai ke temu aku. Tentu bisi iya ke bukai. Tang ni naka
sukung gerempung ke udah dirintai aku nya tadi dipelabaka aku manah tanya tu
dilempai aku ngagai kitai raban pemacha ngiga pansik sereta nguji nyaut entelah
aku nya. Iya ti nyenggala amat dipeda bisi mantu ngangkatka jaku Iban nya
Yayasan Tun Jugah. Mayuh amat kereban bacha udah dikeluarka sida senentang
budaya Iban.
Media
sosial
Jaku
Iban Iban ke dikena ba media sosial diatu mayuh amat. Penulis meri tabi puji
ngagai bala Iban ke sanggup nyukir lalu nulis karang sida baik nya ba blog
tauka ba laman web ngena jaku Iban. Tang utai ke ngenyinuka ati nya mayuh
bendar chara sida nyepil leka jaku Iban ngujungka nadai sistem sepil ti meruan
sereta nyampun. Tu tau mai empas ti negatif ngagai bala nembiak sekula ke
ngambi pelajar Jaku Iban kelebih agi ngagai sida ke ngelawa Internet laban nya
tau meba runding sida lebuh nulis. Amat mih kitai enda ulih nyalah penulis blog
ke nadai ngena sistem ti meruan tang enti sida sanggup belajarka sistem sepil
ke dikena ba sekula tentu nya pulai ke pemanah pemansang jaku Iban ba sukut
akademik.
Jaku
Iban balat agi dipebasaka bansa bukai enti jaku kitai meruan bisi sistem.
Bisi
mega surat berita ke nguji nunda sistem ari sekeda orang ke ukai autoriti. Sida
tu tentu bisi agenda kediri empu ngena sistem sepil sida nya. Jaku Iban enda
tentu ulih disemakaka baka jaku bukai indah jaku bukai pan bisi lebas lebuh
nyepil tauka nyebut sesebengkah leka jaku sida. Ngena sistem sepil ke bebida
tau bendar ngelubahka proses ngerembaika jaku Iban tu kelebih agi ba sukut
akademik.
Laman
web, blog, bup, majalah enggau surat berita ke ngena sistem jaku Iban ke dikena
ba sekula patut nyadika kereban dikena mantu nembiak ke ngambi pelajar jaku
Iban. Iya ke bukai kelebih agi ke nadai sistem sepil ti meruan enti ulih dikena
pan semina nyadika kereban alai matih nembiak nyeruri sepil enggau jalai jaku
sida nya. Pengatur sekula mega bisi kuasa enggai nerima bup ke ditulis penulis
ke enda ngena sistem sepil ke dikena ba sekula kemaya hari tu.
Sukung
orang politik
Sukung
orang politik pan manah enti bisi; enda milih nya ari parti ke merintah menua
tauka parti penyakal. Tang taja pia, sukung tu kadang-kadang tau mai empas ti
negatif laban tiap-tiap iku orang ari parti politik lebuh bejaku tentu bisi
ngembuan agenda diri ke deka diasur iya. Agenda nya kadang-kadang enda seriran
enggau agenda pemansang jaku Iban, nama agi enti jaku Iban nya udah dipolitikka
sida. Parai kitai enti sida udah melitikka jaku Iban. Nadai salah sida sekali
dua bejakuka pekara tu ba tikas parlimen tauka kaunsil nengeri laban iya ulih
terus ngidupka seput jaku Iban tu tang pekara ti dikerandau nya utai ke mai
pemansang ngagai jaku Iban.
Simpul
penemu
Pelajar
Juluk Kurikulum Bahasa Iban sekula sekondari nya dikena
nempa ngaga, ngambuh nyepuh nembiak ngambika sida ulih sereta pintar
bekomunikasyen dalam pengidup sida besehari-sehari baikka nya maya begulai
sejalai enggau orang bukai, maya ngulihka penemu, rindu sereta belematika mayuh
macham ensera enggau jerita dalam mayuh genre tauka pandai mantaika buah pikir
enggau asai ati diri ngena jaku Iban standard. (Turai Pelajar Bahasa Iban).
Kurikulum ti ditempa sida opis pelajar endang meruan
menyana sereta manah lalu diarapka ulih napi daya pengidup nembiak jemah ila. Semina
utai ke patut diperundingka lebuh meratika kurikulum tu nya ari sukut awak ke
diberi ngagai pengawa belajar enggau belajarka jaku Iban sereta penyukup
personel enggau kereban ke dikena. Kati awak ke diungkupka nya chukup tauka
enda? Pengajar nya bisi tauka nadai? Kati keraban bantu ngajar enggau belajar
nya bisi sereta chukup?
Peresa
Peresa perintah baka ba
tikas PMR enggau SPM nya digaga pemutus iya belalauka Norm Reference Testing. Tanya
belalauka Norm Reference Testing tu balat agi betukuh generik sereta
ngemaksimumka pemida pengulih entara siku nembiak enggau nembiak bukai. Tanya mega
ngambi perati ti berat senentang aspek pengemar tanya ngambika tanya ke digaga
nya ngembuan tikas pengemar ti enda kelalu mar tauka mudah lalu dipelaba saut
nembiak ke betul ba tikas 50%. Tanya peresa ke belalauka Norm Reference Testing
tu mega ngembuan indeks diskriminasyen ke tinggi entara nembiak pandai enggau nembiak
ke kurang. Lebuh ngeripot pemutus peresa, Norm reference Testing kadang-kadang
nguna graf normal nyadika pelasar manding pengulih nembiak. Tu ke
kekadang enda ditemu raban pengajar tauka sengaja enggai ditemu sida tauka sekeda
prinsipal. Lebuh perintah nguji ngumbah sistem tisih nasional ari Norm
Reference Testing ngagai Standard Reference Testing mayuh mega orang enda
besetuju kelebih agi raban apai indai enda arapka bala pengajar ulih nisih anak
sida enggau rentang. Seagi-agi kitai nguna norm refernce testing nyadika
pelasar ngaga pemutus peresa nembiak seagi-agi nya mih kitai meratika pemutus
peresa belepelasarka graf normal. Baka ni utai tu dikira enda ulih dilansa ba
artikel tu laban enti diterang enggau ngelansa tentu iya enda nyentuk. Semina tu
aja ambika lalau kitai; anang ngarapka pemutus peresa ti manah enti mimit agi
nembiak ngambi sesebengkah keretas peresa nya. Pengulih nembiak ke ngambi mata
pelajar jaku Iban ke semina 1000 iku tentu bebida enggau pengulih nembiak ke
ngambi keretas Bahasa Melayu ke nyampau iya nyangka datai 400,000 iku.
Forum jaku Iban
Forum beganti forum,
seminar beganti seminar, simposium beganti simposium digaga kena ngangkatka
jaku Iban. Penulis besetuju amat enggau pengawa tu taja pan nadai kala dibai. Kitai
ke rayat selama jarang amat dibai enggau ngulu pengawa tu tang iya suah amat
udah didinga berita senentang pekara tu diaturka sekeda aktivis jaku Iban
begulai enggau gerempung ti bisi bekaul enggau nya. Tang realiti iya tetap dipeda
ari pemansang jaku Iban tu enggau
penyampau orang ke ngambi mata pelajar jaku Iban ba tikas peresa perintah baka
ba pom tiga enggau SPM. Kitai amat gagit ngatur forum, seminar tauka simposium
tang enti nadai nyadi utai iya semina baka sempama jaku tuai; baka kepayang
ngadaka dilah.
Orang bukai megai ulu
Endang amat jaku dalam ke
madah orang bukai megai ulu kitai semina megai mata. Kekadang sida ke mekuh
pengawa ke bekaul jaku Iban tau disema baka orang ke bediri tepantup pala,
duduk ditanchum tuga; dilua mati apai, diempa parai indai. Semua pemutus penemu
sigi di baruh orang ke megai ulu. Nya alai kadang-kadang utai ke nyadi enda
ulih nitihka dikarapka kitai. Kitai nyangka gaga ati ninga IPG Kampus Sarawak,
Miri udah diagih muka kelas matih pengajar jaku Iban. Berita tu manah didinga
laban diatu udah dua buah institut pematih pengajar diberi peluang matih
nembiak nyadi pengajar jaku Iban tang enti deka nemu ari sukut realiti iya
nadai berubah laban penyampau nembiak ke diambi tetap 30 iku aja; semina
didinga berita manah laban dua buah kampus.
Taja pia kitai patut
ngembuan semengat ke tinggi; anang alah umba orang. Mimit aja orang udah
ngeringka diri kitai pan lalu takut. Ambika banding bisi sekeda kitai meratika
pemutus peresa SPM jaku Iban jai taun nyin kemari lalu ngumbai nya kereja
sekeda orang ke nindingka pemansang jaku
Iban. Kitai pan lalu ngurangka penyampau nembiak ke ngambi jaku Iban. Tu ngasuh
orang ke enggai meda pemansang jaku Iban tu enti amat bisi gaga agi ati meda
ulah kitai nya tadi. Ke ulih sida gaga agi sida enti penyampau nembiak ke
ngambi jaku Iban nya majak kurang-sekurang. Utai bansa tu udah kala nyadi. Nama
subjek nya udah nadai agi ba rintai kurikulum bansa anang ngumbai nyamai deka
ngidupka iya baru. Anang ketegal siku
keretum kelambu ditunu.
Ngemansangka jaku Iban enda ulih diraup siku dua orang
aja; enda alah dikemansangka kitai siku taja pan ati deka. Baka nya mega jaku
Iban enda ulih diangkat kitai semenua kitai sekaban belayan aja. Kati enti
kitai udah lesi dibai hari ila dih sapa mih deka nyambung pengawa kitai nya? Ngemansang
sereta ngangkatka jaku Iban tu tanggung pengawa semua orang ke rinduka jaku
Iban enda milih menua baik nya di Rejang tauka di Lundu din baka ditu; enda
milih kaban enda milih belayan. Ingat mih jaku tuai; rangkang siti mudah patah
tang rangkang seberekas enda ulih jamah. Semua kitai ke raban bansa Iban patut
sedada sama seati ngangkat sereta ngerembaika jaku Iban ba tikas akademik
ngambika iya enda lesi dibai hari, enda danjan dibai bulan.
Aku setuju amat enggau penemu nuan tu tuan. Berani sereta semitan
BalasPadamUlasan ini telah dialihkan keluar oleh pengarang.
PadamTerima kasih ngagai sukung nuan tuan pengajar.
Padam