Jaku Lalau Ngagai Raban Pengajar Ke Baru Posting

Enti kitai berengkah gawa nyadi pengajar endang mayuh utai ditapi baik nya positif sekalika negatif. Semua perkara tauka teori ti udah dipelajar  maya belajar suba, semua nya nyau enda tat agi deka dipraktikka ba sekula. Taja pia enti enda bejimat atur singkang, dia salah haribulan kitai semina nyingkang nuju kuing ke tau nganchurka pengidup kitai jemah ila iya nya dalam bidang pelajar. Ngagai pengajar ke baru posting, tentu mayuh penguji ke nganti kita sebuat. Nya alai aku nguji deka bekunsi lalau mimit ngagai bala kitai ke baru posting nyadi pengajar, ngambika ngepun sereta ngembuan singkang dalam pengawa ngajar enggau manah! Aku udah lama ninggalka sekula lalu tentu mayuh ubah pemansang ke nyadi ba sekula ke enda ditemu aku tang penemu ke dikunsi ditu belalauka pemerati aku ari bala pangan ke mengkang nyadi pengajar sereta agi angkun ngajar sereta narak nembiak.

1.              Betanya Ngagai Senior

     Tu mih pekara keterubah ti patut digaga bala pengajar baru, tang suah agi enda dipeduli sereta diperatika enggau berat ba sekeda sida ketegal ku sida bisi chara kediri empu. Kitai ke baru datai ba tempat baru patut bendar betanya ngagai raban pengajar senior senentang sekeda pekara di sekula baru awakka enda mayuh pekara ke kena pansa kitai. Ba penemu aku raban pengajar senior enda mega mangah sereta terit enti dipinta mantu sereta ngiring bala pengajar ke baru. Enti enda tentu betanya, salah haribulan mayuh utai ke deka digaga kitai suah sama sereta betandu. Nya alai tanya mih! Anggap mega tu siti ari chara komunikasyen dikena ngemunka pejalai pengidup kita nyadi pengajar baru ba tempat baru.

 

        2.    Anang Udu Serebana

Tu pekara kedua ti patut diseliahka. Suah bendar nyadi. Pengajar baru udu deka komplen pekara tu enggau nya. Semua enda kena. Tu enda kena nyin salah. Tu enda patut nyin enggai nyadi. Kati enda, laban ke ngumbai diri profesional! Kadang-kadang kitai enda ingat ukai kitai nya aja ke profesional ba sekula. Badu agi ngembuan pengawa diva nuan nya! Kitai ke baru ngajar manah agi anang udu komplen taja pan nyangka chara kereja di sekula baru bisi bebida enggau pengingin sereta pengadang kitai. Peratika dulu budaya kereja ba tempat baru, udah nya baru ngaturka singkang. Enti enda baka ke diadangka kitai, pun mih enggau misyen ngubah chara kereja, bepun ari diri empu! Ke selalu iya, ari sukut realiti, pengajar ke mayuh komplen di sekula nya pengajar ke mayuh agi enda ngaga kereja di sekula! Amat nya kini?

3. Minta Subjek Major?

Ketegal ke agi gagit enggau fantasi maya belajar di universiti ti penuh enggau teori, mayuh bala pengajar baru posting nganjung peminta (kadang-kadang kelalu) nuju raban pengatur sekula minta deka ngajar subjek major sida. Endang enda ulih dikenggaika sigi patut, nama reti nya udah belajar 4 ngagai 5 taun, enti enda ngajar subjek major, enda pia? Ya .. nya mih pengadang enggau juluk ati. Tang realiti iya, mayuh pekara ti patut ditimbangka  dulu lebuh meri aturan ke raban pengajar ke ngajar sesebengkah subjek  di sekula. Senioriti, subjek ti puang, penyampau kelas ti enda mayuh, maya posting sereta sekeda  faktor bukai ngasuh 'kebuah raban pengatur sekula meri subjek ti enda sama enggau subjek major kitai'. Enti peminta deka ngajar subjek major enda bulih manah terima aja subjek baru. Enda ibuh ngeringka rekung. Anang enda nguji baru mega jemah ila engka ichak tau bulih. Manah agi beterima kasih sereta mupuk ngurangka besangka jai ngagai raban pengatur sekula.

4. Anang Ngaga Diri Pandai

Bisi mega dalam raban pengajar guru baru ti kelalu 'pandai'. Semua utai deka diatur nitihka peneka diri empu. Kitai patut nemu enti ba sekula baru, tentu budaya kereja enda sama baka ba sekula ke alai kitai praktikum. Tiap-tiap sekula ngembuan sistem kereja kediri empu. Bisi sekula enda gagau, bisi nya gagau mimit, iya ke endang gagau sereta sekula ke ngaga diri gagau! Nya alai, manah agi maya ba renggat keterubah tu kitai nyadi follower dulu, ari ke nguji deka nyadi leader. Enda ibuh ngembuan juluk ati ke tinggi amat maya ba renggat keterubah tu. Peratika dulu, udah nya baru ngaga perambu, enggaika nuan nya tesalah singkang lalu tau ngujungka nuan nya enda kini-kini.

5. Seliahka Ari  Kelalu Bepanggai ba Orang

Bisi mega raban pengajar baru, kadang-kadang ke kelalu bepanggai ba pengajar senior. Nadai salah lalu nadai nyadi penanggul. Tang anang datai ke kelalu bepanggai ba pengajar senior ngujungka ngenusahka sida. Semua pekara ngarapka pengajar senior! Enda patut,  laban kitai empu udah nerima latih nyadi pengajar lebuh ba IPG tauka universiti. Nya alai, kitai patut nguji bediri kediri ngena penemu enggau peneleba ke bisi dikauk kitai maya kitai agi belajar suba. Enggau nya nyangka kitai tau mega mujur. Aku empu belalauka perati aku bisi bendar pengarapka latih enggau peneleba ke diberi sida IPG enggau universiti maya kita agi belajar suba. Pajakka pengawa kita lalu angkatka imej diri kita nyadi pengajar ke dipebebasaka orang!

6. Nerima Utai Ke Nyadi

Selalu iya bisi sekeda pengajar ke kelalu gagit enggau sekula baru kelebih agi sida ke diposting ke menua pesisir, ke Sabah enggau ke Sarawak. Mayuh peneleba baru ke ulih diasai sereta deka dicheritaka ngagai orang bukai. Tujuh hari tujuh malam bedau tentu abis utai ti deka dicheritaka. Tang bisi mega sekeda nya enda ulih nerima penyadi utai. Sigi amat sekula kitai nya jauh, ba ulu din, ba menua pesisir. Orang bukai sigi enda mereti. Sigi betul, tang anang enda ingat bisi mega pengajar bukai ke ngajar di sekula  ti jauh tusah, balat agi merinsa, jauh agi di ulu din ari engkitai. Beterima kasih mih ke utai ke udah nyadi ba diri empu. Kurangka serebana, uji bantaika ngagai diri empu enggau komuniti nya kitai endang patut digela pengajar! Pengajar ukai sengapa kada tang pengajar lati.

7. Angat Tahi Manuk

Tu mega siti sindrom ti patut diseliahka. Nya alai laban baru deka berengkah bekereja tentu mayuh pekara ba dalam pikir senentang utai ke patut dipejalaika kitai. Semua utai deka digaga. Tu lah.. nya lah. Tang pengujung iya? Jelungan! Nama kebuah pekara baka tu ulih nyadi?  Kebuah pia laban lemi semengat sereta jampat putus pengarap. Patut diingatka mega, maya deka ngepunka nya sigi senang! Tang deka ngujungka sesebengkah pekara ke manah nya bisi deka tusah mimit. Kitai patut ngeringka semengat sereta ngembuan prinsip idup ti betul lebuh nengkebang pemaiulah kitai. Enti kitai bisi juluk ati ke deka ngasilka sesebengkah pekara ti manah ba sekula baru, bepun mih enggau idea ti mit sereta iya ke ulih digaga dulu. Udah nya, lebuh udah nyadi, baru ngerembaika idea nuan nya mimit-mimit datai ngagai ke besai agi sereta iya ke beguna sereta selama jeman. 

8. Post di Facebook

Ba jeman ICT kemaya hari tu nyau deka semua orang bisi akaun ba laman sosial, nya alai anang enda pintar bekenaka Internet! Kebuah pia, mayuh bendar kes, orang bisi tesalah singkang lebuh bekenaka perengka guna tu, kelebih agi serebana ati ti enda patut ayan ba Facebook enggau Twitter. Kira dadak mih enti bisi orang ke enda nemu utai ke dibantai iya ba laman sosial nya ulih dibacha nyau deka semua orang, nyengkaum orang ke ukai 'Friend'. Nya kebuah kitai patut bejimat lebuh ngeluarka jaku, update status diri enggau komen-komen kitai pasal pengajar senior sereta sekula baru kitai nya laban kitai enda nemu sapa ke bisi enchuri meda Facebook kitai. Kada enda kepala pengajar tauka prinsipal kitai??

9. Kaul Enggau Pengajar Senior

Anang berat mulut, kemerahka diri sereta punka randau kitai enggau pengajar senior, tanda ngemasaka sida ke bisi dia, sereta 'nyedarka' sida nya kitai bisi dia ketegal nyadi pengajar baru ba sekula nya. Anang sanggu nampil sida dalam randau lalu anang sekali-kali mantul ngapa enti sema bisi sekeda pengajar senior ke enda nerima kitai ke baru dia. Enda rugi kitai taja pan semina bemudalka ai liur sereta tuchum manis mimit. Enti dipajakka tentu bisi pengajar ke lawa ba sekula nya pan ulih tetarit ati enggau tuchum kitai nya. Ingat, enti deka nyadi pengajar ke manah ba sekula baru, tentu servis enggau peneleba pengajar senior nya begunaka amat ba kitai. 

10. Anang Nulak Kereja

Tu siti agi pekara ti patut diseliahka. Kitai ke nyadi pengajar baru tentu deka ngepunka karier pengajar kitai enggau manah. Nya alai pekara ke baka tu enda patut nyaadi. Raban pengatur sekula enda mega gagit amat deka begunaka tulang kitai ke agi biak nya. Berat pengawa ti diberi sida ngagai kitai endang bepelasarka pengawa bukai ke diberi. Enti sema bisi lebih pan, nyangka ketegal bisi enda chukup kaki jari sereta mega faktor bukai. Enda ibuh kitai ngumbai tuju orang meri pengawa ngagai kitai laban deka 'ngulika' kitai. Kitai patut ngambi pekara nya ari sukut positif. Anggap mih tu peluang dikena kitai ngauk penemu baru enggau naka ulih. Ketuka budaya tachuh-komplen-tachuh lalu tukar ngagai diau-kereja-diau. 

Pengajar lama nadai kereja, tang pengajar baru meruan bisi pengawa ngelinggi punggung!!?.

Enda ngawa nya, kapa enda sida baka nya. Kitai ke baru dia, tang nyangka pengajar nya udah 10 taun mekuh pengawa nya sebedau kitai datai. Beri peluang iya belelak mega. Diatu idar kitai mih ngereja pengawa ke diberi enggau naka pemanah sereta terus besangka manah ngagai sida ke senior. Enda rugi kitai tulihka peneleba ti lebih!

11. Salah Masuk Geng

Sepekara agi ke suah nyadi ba sekula nya bisi nyadi iya nya rampa dunya politik sereta enggau geng-geng tauka raban. Geng pengajar bengkel, Geng kaki bejaku pasal orang, Geng kaki nginsap, Geng enda tama kelas, Geng bayau-bayau ba kantin sereta mayuh macham bansa geng bukai ke bisi ba sekula. Masuk mih geng ti betul ngambika sida ulih ngiring ngembing kitai nyadi tukang tarak ti manah. Pia mega, ngarapka sida ulih meri perangsang ngagai kitai ngambika terus ngereja pengawa ke manah dalam dunya pelajar. Patut seruran dikingatka mega pugu tanggung pengawa kitai ke sekula endang masuk kelas lalu ngajar! Enti kitai ke sekula, tang enda tama ke kelas, enda ngajar, enda narak nembiak, ulihka kitai ngumbai kitai bulih duit gaji kitai ari penatai ti beresi tauka halai munyi ku jaku orang kemaya hari tu? Semina petara aja nemu!

Penutup

Tu semina sekeda ari pekara ke deka dipekunsika enggau raban pengajar ke baru ngajar enda milih nya ngajar ba sekondari tauka primari, ba menua ulu tauka menua ili, ba nengeri tauka ba petisir. Ngagai raban pengajar ke baru aku meri Selamat Napi Dunya Pengajar sereta Selamat Mujur!