Empas Negatif Bekenaka Gajet

Pemansang teknologi gajet mayuh nguing runding enggau pengidup mensia kemaya hari tu. Apai indai ke bebelika anak-anak sida enggau mayuh macham teknologi moden patut bepikirka empas negatif ti deka ditanggung anak-anak sida. Dunya pascamoden kemaya hari tu bedau tentu nyamin mayuh pemanah laban iya bisi mega mai penyai ari revolusyen teknologi ngagai anak-anak kitai.

Entara pansik ti udah dipejalaika di Edinburgh Sleep Centre ngayanka pemutus ke ngenyitka ati. Raban penguna peranti elektronik enggau tikas guna ti kelalu udah bisi ditemu ngachau kualiti tinduk. Maya tinduk ti dikachau ketegal ngena gajet elektronik tu ngujungka orang nya obes tauka gemu. Hal tu ketegal ulah jai tinduk ti ngeruga fungsyen hormon ti nyaga diri ari lapar sereta nambah pengingin deka makai pemakai ti tinggi kalori. Penanggul tu mih entara kebuah obesiti ba raban nembiak mit. Kena mutarka penanggul tu, bala apai indai patut ngalihka pengawa begunaka peranti elektronik enggau gajet ari sida nembiak. Atur tinduk ti terit mega patut dipejalaika ngambika pekara ti ngeruga hormon ulih diseliahka.

Siti pansik ti mungkur 2000 iku apai indai enggau anak sida ke berumur tiga ngagai 16 taun madahka nyau deka setengah ari nembiak ti dipansik diberi kereban ayam mudah alih lalu 50 persin agi ngembuan kereban ayam video. Ketegal apai indai ke nyediaka gajet baka tu, nembiak tu udah ngabiska maya sida nyentukka tiga jam sehari meda televisyen, bemain komputer tauka ngelawa Internet. Tu ke ngasuh maya kualiti enggau diri sebilik majak kurang-sekurang. Diperatika ari pansik tu mega madahka siku ari empat iku apai indai  betalat enggau pangan diri ketegal hal ke bekenaka gajet di antara sida. Perkara tu tau ngujung penusah ngagai institusyen ruang bilik sereta patut dijaga ari tumu agi sebedau iya nyerarai nyadi serius.

Apai indai kemaya hari tu patut nemu enggau terang senentang kereban teknologi ti engkeman diguna bala anak sida. Nyediaka kereban ayam ti kreatif ulih mutarka penanggul tu sereta ulih meri situasyen ke manah agi dalam pengidup anak kitai lalu mega ulih nyeliahka ruang bilik ari bepechah-belah.