Di entara kitai tentu bisi ngembuan runding ke madah bepikir
nya ukai utai ke ulih diajar ngagai nembiak ngambika sida ulih nyadi pemikir. Mayuh
ari kitai ngembuan anggap ti baka nya.
Mayuh orang ngembuan anggap lalu pechaya siku-siku orang
nya tentu iya diada ngembuan akal tauka enda. Tu anggap enggau pengarap ti enda
betul. Bepikir kreatif enggau kritikal nya sebengkah ari pengelandik lalu iya
pekara ti ulih dipelajar.
Taja pan baka nya, iya mega bisi kaul enggau isu pemansang.
Nembiak diperatika kurang agi bepikir chara analitik enti dibanding enggau
orang besai tuai. Chara nembiak bepikir bepanggai aba pengadang pengajar enggau
apai indai senentang pengulih sida bepikir sereta ngaga timbang penemu kediri
empu.
Sida sekula mega seruran meri perati ngagai ajar senentang
pekara ti nembiak patut pikir lalu ukai narak sida chara bepikir. Nambahka nya,
apai indai suah agi madah tauka ngasuh anak sida bepikir.
Tu nyengkaum madahka pemesai reti anak ngembuan ulah ti
betul. Taja pia jaku asuh tauka jaku padah ti diberi apai indai nya semina
diterima nembiak enti sida diperansang bepikir senentang kebuah sekeda ulah nya
dikerindu bebanding enggau ulah ke bukai.
Pengajar nemu mayuh nembiak agi lubah dalam pengelandik bepikir.
Entara kebuah iya nya ubah dalam budaya baka pengawa ke rindu ke muzik, meda televisyen,
main video, ngelawa laman web, ngembuan network sosial enggau pengawa
beranjungka pesan nengah telefon binching.
Kitai nadai ngembuan penanggul madah ngagai anak kitai
senentang pekara ti patut dipikirka, tang lebuh runding sida nyau beserapun dia
kitai enda sanggu nyaup sida.
Mayuh apai indai enggau pengajar guru ngembuan runding ke
madahka nya enda manah enti sema kitai mungkal nguji nembiak bepikir lebuh
runding sida nyau beserapun. Sida nangika penguji nya ulih ngelabuhka rega diri
sereta ngemaluka anak.
Realiti pekara tu ujung-ujung iya ditemu anak nya empu
lebuh nemu diri empu nya enda ulih bepikir baka tawing sida ke ngembuan
pengelandik bepikir ti semitan ngujungka sida berasai ngemaruhka diri.
Sekula enggau
raban pengatur mega nambahka penanggul tu. Nembiak semina dilatih meri sereta
ngiga saut ti betul aja. Saut ti udah ditentuka sereta standard pengelandik ke
udah ditetapka mega nadai meransang nembiak bepikir ba luar kutak.
Agi mayuh nembiak ke nadai pengarap deka bepikir kediri
empu. Iya ti bendar sida tu takut nguji deka bepikir. Ari sukut realiti, nembiak
tu ke bendar nya raban pemikir kreatif pemai-ada tang raban sekula mih ti
nagang nembiak bepikir chara analitikal enggau kreatif.
Dalam budaya kitai, siti ari endur idea ti bewawasan ulih
diasilka tang enda disengkaumka kitai iya nya sekula.
Tiada ulasan:
Catat Ulasan