Australia
nya sebuah menua ke naga diri bulih penuduk ba lumur lima pengabis atas dalam
pemayuh penyampau midul enti sema sida tembu berumpak ba lumba Olympik tu ila. Prestasi sida ba Olympik majak nurun kenyau
ke tulihka rekod 58 iti midul lebuh sida nyadi tuai rumah Lumba Olympik 2000 ba
Sydney. Maya nya sida ba penuduk keempat.
Baka
menua ke mimit agi tubuh ari menua kitai Malaysia, Komiti Olympik Australia
dipeda enda malu ngaga taga diri enggau juluk ati sida taja pan sida nemu sida
tentu napi jaku pejah ari media enti sema sida enda tulihka juluk ati nya.
Munyi
ku jaku Presiden Komiti Olympik Australia, “If
you are prepared to accept something less, then something less will happen. You
might not always achieve what you aspire to, but I’d rather have a target that
is up there than giving up before we start.” Jaku iya kurang lebih munyi
tu; enti kitai besedia napi utai ke kurang tentu kurang mega utai ke dikulihka
kitai. Nuan tentu enda tulihka juluk ati nuan belama tang ba aku, kitai mesti
bisi taga ti tinggi sebedau berengkah. Manah amat jaku iya tu.
Bah
enti dipulaika ngagai menua kitai Malaysia - lapa Kunsil Olympik Malaysia (OCM)
ngambi ‘jalai muntang’ lalu enda berunding deka ngaga taga diri tauka juluk ati
ke raban pelumba maya Lumba SEA di Singapore bulan Enam tu ila? Pekara tu
nyangka amat enti kitai semina nganjung empat lima iku atlet baka ke ngagai
Olympik. Tang iya ke tu nya lumba ba menua ke ngelingi kitai tauka regional.
Nambahka nya mega kitai maya tu ila nganjung pengari kira 600 iku atlet ke
Singapore.
Kati
tu ketegal ari pemuntan kontinjen nasional kitai ba Lumba Commonwealth Glasgow
enggau Lumba Asian di Incheon taun nyin kemari? Maya nya kitai tulihka midul ke
mimit agi ari lumba ke dipasukka kitai sebedau tu. Kati gagaka raban pengatur
lumba kitai enti bala atlet tulihka 43 midul mas iya nya penyampau ke sama
enggau maya sida belumba ba Myanmar 2013 suba?
Sida
ti patut mega disalahka senentang pekara tu nya raban gerempung lumba enggau
main, laban sida mega setuju enggau penemu nya. Reti nya sida mega ngembuan
pengadang ti kurang ngagai raban atlet sida empu.
Dipelabaka
semua kitai besetuju madahka lumba enggau main tauka sukan nya belalauka prestasi tauka performance based lalu atlet mujur dalam lumba sida belalauka taga
tauka juluk ati sida. Uji tanya sida Tiger Woods, Lewis Hamilton tauka Rafael
Nadal – nadai enda sida tauka sapa-sapa atlet tebilang dunya sanggup nerima
pengulih ti baruh ari juluk ati diri. Nadai sapa sanggup madah – nadai ngawa
alah asal kitai udah enggau; pama mih. Indah menua ke berimbai pendiau enggau
kitai ari selatan pan nemu sereta ngembuan taga ti tinggi. Sida naga diri bulih 50 ngagai 70 midul mas
maya lumba tu ila laban lumba tu diatur ba menua sida empu.
Tang
kitai Malaysia bisi penyelai mimit. Kitai bepuas ati semina nganjung raban
atlet kitai masuk lumba nya lalu nadai naga nama-nama utai ulih. Semadi
nganjung sida aja pia ku reti nya. Endang amat kitai ke bejaku munyi nya laban
deka ngurangka sida atlet ditekanka kitai tang nya mega baka ke nganjung pesan
ke salah belama-lama. Ni maya kitai enda nganjung atlet ke semadi nadai? Enti
munyi nya sida atlet tu semina datai belumba sengapa-kada asal enggau aja,
anang irauka alah tauka bulih midul tauka enda.
Atlet
endang semampai dilatih sereta dikirai kitai sereta diasuh belumba enggau naka
ulih. Kitai nangi atlet Malaysia tu disemaka baka ai bah perau enda anyut, telah
agi kemarau panjai. Suah amat kitai ninga atlet kitai madah asal bulih
midul enda milih nama chura.
Enda
alit ati enti sema ba bidang Lumba enggau Main Malaysia tusah bendar tegigaka
orang ke patut nganti sida Lee Chong, Nichol David enggau ke bukai. Ukai nama
laban kitai suah berundingka sulu jaku – semadi nadai.
Tiada ulasan:
Catat Ulasan