Jaku ti dominan majak ganas bekuasa nerekam sereta ngerengkap jaku etnik minoriti lalu ngujungka sekeda jaku nya lenyau ari dunya tu
KUCHING: Diatu udah maya semua opis perintah, gerempung enggau serakup, kompeni penyelak media rama enggau raban bukai berakup sereta ngena sistem sepil jaku Iban ke sama, ku Tan Sri William Mawan.
Iya ke mega Menteri Pemansang Rama madah, bengkah pelajar sekula diatu ngembuan sistem pelajar jaku Iban stindit, lalu dikena nyukung pengentap sistem jaku Iban nya, opis menteri ke dikuasa iya numbuhka Unit Adat Asal Etnik.
Ku Mawan, Unit Adat Asal Etnik ke ditumbuh pengudah Simposium Budaya Iban di Sibu dalam bulan Ogos 2013 ditulung seiti unit ke dikumbai Unit Kaunsil Penyanding Penemu Adat Asal Etnik.
“Unit tu deka ngemataka pemansang jaku Iban Stindit dituchi sereta diberesi, dikena semua baka di sekula, palan pematih pengajar, palan pelajar tinggi, opis pengerembai berita mass media ke lebih agi di radio enggau industri muzik.
“Opis pemansang rama merening pemansang jaku Iban tu enggau panchar tauka tenggau ti luas agi baka ti dikemeratka aku rambau Simposium Iban suba, ke alai tetiap iku kitai patut merening jaku Iban nya sebengkah ari sukut pengidup enggau pemansang runding bansa Iban,” ku iya.
Iya mansutka jaku tu ba pengawa bejadika Aum Besai Ninting Taun (AGM) ke 4, Gerempung Pemansang Pelajar Jaku Iban (AEDIL) di sebuah hotel ditu, kemari.
Mawan nambah dalam dunya globalisasyen ti sedawah ti nadai entara, jaku ti dominan majak ganas bekuasa nerekam lalu ngerengkap jaku etnik minoriti, ti tau ngujungka sekeda jaku nya ayas lalu lenyau ari dunya tu.
“Nya alai enti jaku Iban bisi ditaga nyadi seiti jaku ti lati, ti dikearap nyadi pesaka menua enggau bansa, guna jaku tu patut ngelui ari ti udah sereta ngerekai ngagai mayuh agi bidang enggau disiplin penemu,’ku iya.
Iya pechaya dalam millenium ti balat tujah pemar baka ke diatu, jaku Iban endang sama sebaka enggau jaku bansa bukai, iya nya sama enda ulih rari ari ti kena teruju, kena tempuh pengerusak jaku.
Kebuah pia ku iya, ketegal dunya ti balat ngemeran teknologi komunikasyen enggau pemadah (ICT), ti mansutka bemacham penyakit pengerusak jaku.
“Ukai semina ba bala nembiak aja tang mega bala besai tuai, ba sekeda bala ke enda siru enggau jaku diri, tambah mega jaku kitai nyau mayuh bepakan pasuk enggau jaku bansa bukai ti ngujungka sekeda leka jaku kitai majak lelang, majak midang, majak lenyau,” ku iya.
Berindik enggau nya, Mawan pechaya sereta nemu kaban komiti gerempung AEDIL sigi udah besedia enggau strategi dikena napi sebarang penguji dalam ngemansang, ngentap sereta ngenegap jaku Iban.
Beserimbai enggau nya, Mawan lalu ngagihka belanja RM30,000 ngagai AEDIL.
Bela datai Presiden enggau sapit AEDIL Dr. Lambat Lindong enggau Dr. Linton Britten, Sekretari (Dipebasa) Harold Unsie enggau kaban komiti bukai.
- Dibali ari Utusan Borneo
Tiada ulasan:
Catat Ulasan