Ubah nyangka mai pemujur ba orang ke ngiga kereja

Menteri Pengereja Pengawa, Datuk Seri Riot empai lama ti udah bisi madahka penyampau sida ke bedau bisi kereja ba menua tu iya nya urung 399,500 orang (Harian Metro 13..15). Majoriti sida ke bedau bisi kereja nya sida ke enda apus sekula, sida ke naka Penilaian Menengah Rendah enggau Sijil Pelajaran Malaysia.

Di baruh Perambu Malaysia Lumpar ke-11 perintah bisi langgur deka nyedika 1.5 juta kereja maya 2020. Nitihka pukul rata, 300.000 kereja bisi dilanggurka perintah ninting taun datai ngagai timpuh nya ila. Perambu perintah tu bisi ngenyamaika ati sida ke benung ngiga kereja tang nya ukai reti iya sida kelalu bepanggai ba perintah. Kebuah pia, laban pengawa puang balat agi bepanggai ba gaya ekonomi. Kitai pan bela kala ninga berita pasal sekeda organisasyen  nyengkaum sektor bank bejalaika skim ngetuka pengereja pengawa tauka ngetuka pengawa ngambi pengereja pengawa baru.

Penatai Pengereja pengawa ari luar

Lebuh isu rayat menua tu agi mayuh ke bedau bulih kereja dia kitai mega ninga mayuh agi raban orang ari luar datai kereja ba menua kitai tu. Sida sanggup bepadat dalam perau ngelaban alun gumbang ketegal ke deka ngiga pengidup baru ba menua tu. Gelar orang ke datai enda beradat, penatai haram tauka kampa ke seruran digiga raban penerit adat nyau ngasuh sida kering agi semengat deka tama ngagai menua tu. Ripot ke penudi bisi madahka enam juta pengereja pengawa ari luar  bisi di Malaysia. Mayuh ari sida tu datai ari Indonesia, Nepal, Myanmar, Bangladesh enggau India. Ari penyampau nya semina 2.1 juta aja ke bisi permit gawa.

Kelimpah ari sektor ba betanam betupi, sida mega bekereja nyadi penyaga pengelikun, kuli, penempara sereta nyadi amah. Sida tu mih ke ngirum bebillion ringgit duit kitai ke menua asal sida ninting taun. Sechara enda terus reti nya sida mega nyaup mantu ekonomi menua sida empu. Pekara ke patut ditanya kitai nya ni maya kitai badu bepanggai ba pengereja pengawa ari luar tu?

Anang ngemaruh

Kitai rayat Malaysia patut ubah ulah kitai ke ngemaruhka sekula vokasional, politeknik tauka sekula pengelandik. Kitai enda patut ngumbai sekula bansa tu semina ungkup sida ke enda mujur ba sukut akademik. Diatu udah mayuh kelai nembiak ke kurang lati dalam peresa SPM udah nyadi orang ke mujur dalam pengawa sida. Ambika chunto sida ke mujur tu nyengkaum Steve Jobs (Apple Inc), Bill Gates (Microsoft), Lim Goh Tong (Kumpulan Genting) enggau Loh Boon Siew (Honda). Sekeda surat berita mega bisi mantaika beberapa iku individu ke begaji besai taja pan kurang mujur dalam peresa SPM. Mayuh ari sida tu ngembuan ati ke enda mudah putus pengarap enggau pemujur ti diulihka sida. Sida terus nguji enggau naka ulih ngauk penemu ke ngujungka sida nya mujur dalam pengawa sida sereta bulih gaji besai.

Pemujur bala nembiak redak tu patut nyadika teladan sereta ulih ngeringka semengat nembiak bukai ke udah putus pengarap ke ngumbai pengidup sida enda mujur ukai ketegal enda tulihka A ba SPM. Nembiak patut bisi semengat ti tegap sereta bisi ati deka ngemanahka agi pengurang ke bisi ba sida lalu ngiga peluang sereta ukai nganti bulan labuh ke tanah.

Sida mega ukai semina bekira deka gawa ba opis ke bisi airkon sereta duduk ba kerusi kusyen. Ambi mih teladan ari orang peneleba enggau pemujur orang bukai. Anang sekali-kali sanggu betanya, nama agi enti kelalah nguji.

Mayuh ari kitai ke udah belajar datai ba tikas pelajar tinggi tentu bisi nyimpan juluk ati deka bekereja sepengudah abis belajar. Sekurang-kurang iya kitai ulih ngati kediri lalu enda ngenusahka apai indai kitai. Kitai mega nyangka ulih mayar duit jali pelajar sereta meri duit mimit asil ngagai apai indai. Tang ari sukut realiti, ukai semua nembiak deka bulih kereja sepengudah sida tembu belajar. Nama agi enti kereja nya ukai kereja ke deka ati.

Mesti bisi pengelandik

Nitihka ripot berita, kemaya ari tu mayuh bendar nembiak ke baru nembuka degree sida. Pekara tu tentu meri pengelebih ngagai sida ke ngiga pengereja pengawa laban sida ulih milih sida ke manah.

Bala graduan mega patut berunding sida ke ngiga pengereja pengawa tu ukai semina meda orang ke bulih degree aja tang mayuh pekara bukai. Kuarng pengelandik bekomunikasyen baka softskill suah nyadika kebuah bala nembiak enda mujur maya diinterbiu. Tu mega nyengkaum pengelandik sida ngena jaku English. Sida mega patut ngembuan penteba nyadi tuai, daya bepikir ti kritis, mudah begaul enggau orang, ngembuan semengat espirit de corp sereta ulih ngereja mayuh bengkah pengawa tauka multi-tasking.

Simpul Kenang

Nya mih ketegal ubah pemansang dia semua nembiak kemaya hari tu endang bisi peluang bulih kereja ukai semina sida ke pandai akademik aja. Tang semua tu balat bepanggai ba pengeransing siku-siku ngenjingka diri sereta sanggup deka mujur dalam nama-nama pengawa ke dikereja sida. Kitai ke nembiak anang enda  beseruanka rambai jaku dalam; adat periuk bekerak, adat lesung bededak.