Pengelati nulis asil ari anda jaku engggau runding

Anda dalam konsep artikel ke deka dikenang ditu nya ngembuan reti pengelandik tauka penau ti tinggi ba sesebengkah pekara. Anda bejaku nya reti iya ngembuan pengelandik tauka penau ti tinggi lebuh nguna jaku dikena ngenataika runding diri. Anda bejaku ulih ditimpai ari sukut jaku sebut tauka jaku tulis. Orang ke anda bejaku ulih narit ati peninga ari pun nyentuk ke ujung jaku iya. Besenutuk enggau nya mega orang ke anda nulis nya mega ulih narit ati raban pemacha macha pekara ti ditulis iya ari pun nyentuk ke ujung tulis iya nya.

Orang ke enda landik bejaku ketegal mabu runding, mabu penemu maya bejaku ba mua mayuh tau ngasuh raban peninga nya enda tentu nyamai asai sereta nadai ati deka ninga jaku ke dipansutka orang nya. Kelimpah ari nya mega raban ke ninga nya mega suah agi deka berandau enggau pangan diri maya orang nya bejaku. Nambahka nya mega bisi sekeda nya nyau enda entap duduk lalu mupuk pansut ari endur ke ninga orang ke bejaku nya.

Baka nya mega, enti orang nya enda landik nulis. Tentu raban pemacha iya enda sanggup macha teks ti ditulis penulis nya sampai abis. Iya semina macha segenteran tauka genteran keterubah aja. Pemacha enda teabiska teks nya laban karang ti ditulis nya kelalu enda ngerinduka ati lalu ngujungka pemacha teks nya ngelengka pia aja teks nya laban deka ngiga teks bukai ke manah agi ari nya.

Nya tadi dua tibak pekara ke nerangka empas ari pengawa orang ke enda landik bejaku tauka nulis. Penerang nya tadi udah chukup terang madah ngagai kitai pemesai guna kitai ngembuan pengelandik ti tinggi lebuh bejaku tauka nulis.

Dalam pengidup moden kemaya hari tu kitai patut ukai semina ngembuan pengelandik bejaku tang mega pengelandik nulis. Orang ti landik nulis ulih ngenataika pekara ti tulis iya laban iya ulih nusun lalu mantaika buah runding iya enggau berurun sereta terang. Pia mega, orang ke landik bejaku enti iya mega penulis, utai ke ditulis iya nya mih ke dianti-anti raban pemacha. Raban pemacha berasai lantang lebuh macha artikel penulis nya. Bisi mega sekeda pemacha nya nyau berasai ‘lelenggau’ ke artikel ke ditulis penulis nya baik nya ditulis dalam surat berita, majalah tauka bup.

Taja pia, pengelandik nulis tu ukai datai pia aja ba siku-siku orang. Orang ke anda nulis tu enda tau enda bagas bepansuhka penemu. Dikena ngasilka karang tulis ti manah dia siku-siku orang nya patut ngembuan ati ti deka sereta sanggup bekereja bebendar sanggup betunggang lupung. Pengingin enggau penyanggup tu mih nyadi pugu  pekara ti besai bendar reti ba orang ke enda landik nulis nya bebali nyadi siku orang ke anda dalam pengawa betulis. Bagas bekereja dalam konteks tu nyengkaum nguasa enggau naka pengelebat jaku ti dikena maya nulis – nguasa leka jaku, rambai jaku enggau ayat enggau atur sepil kelebih agi baka dalam jaku Iban formal. Kelimpah ari nguasa aspek jaku, penulis mega patut nguasa teknik nulis.

Ari sukut jaku, orang ke deka nulis nya mesti ngembuan leka jaku ti mayuh sereta lebat. Enti orang nya ngembuan mayuh rintai leka jaku reti nya nyamai endur iya milih leka jaku ti engkeman sereta nemban dikena mantaika sesebengkah pekara. Nambahka nya mega, penulis mesti meretika ukur pemanah sesebengkah leka jaku nya. Kebuah pia, laban jaku bepun ari leka endang segenda udah diperatika ngembuan kaul ukur pemanah enggau budaya bansa ke dikembuanka jaku nya. Ukur pemanah ke disebut ditu nya dikena ngalihka jaku nilai dalam jaku Melayu.

Dalam jaku Iban, mayuh amai leka jaku ti nyeraraka roh ari tubuh; ambika banding baka leka jaku lesi, danjan, rimpi enggau parai. Udah nadai nya rambai jaku dalam ke sama reti enggau keempat-empat reti jaku nya tadi. Taja pia, tiap-tiap leka jaku nya endang ngembuan ukur pemanah ti bebida. Leka jaku danjan munyi ke udah nyadika chunto di atas tadi suah agi dikena ba leka main. Leka jaku parai nya lebih ngagai jaku selama tauka jaku kasar taja pan sekeda Iban selalu ngena iya laban belabuh ari peneleba ke ditejuka. Rambai jaku baka udah nadai, udah nyau, udah dikelaungka nama nya jaku siru sereta bebasa agi ari leka jaku parai tauka mati ti tau dikategori kitai ngagai jaku pinang sirih.

Ukur pemanah ti diletak ba sesebengkah leka jaku nya ngasuh orang ke deka ngena jaku nya enda tau enda nentuka guna jaku nya betul sereta nemban awakka iya ulih ngarika reti ti deka dikenataika.  Endang amai mega pengempu sereta pengguna asal jaku Iban tu tauka bansa bukai ke bisi kaul rapit enggau bansa sereta budaya Iban ulih ngena leka jaku Iban nya enggau betul.

Nangkanka nya mega, nulis tu mungkur mayuh proses. Siti ari proses nya dikumbai nyerenih. Proses nyerenih maya nulis dikerejaka maya ngaga ayat baik nya ngena batang ayat, ayat aktif, ayat pasif sekalika ayat tunsang. Chara milih enggau nguna mayuh bengkah ayat deka ngasilka ayat pandak, ayat jelan pemanjai enggau ayat panjai ngujungka nyadi mayuh macham bansa ayat dalam sesebengkah pekara ti dituliska penulis nya. Empas ari pengawa tu tentu mai pengerindu ngagai orang ke macha asil tulis nya lalu ulih nyadi daya penarit ati ngagai pemacha nya ngambika sida terus macha artikel ke bukai.

Kelimpah ari pekara ti bekaul enggau mayuh macham bengkah ayat, pekara bukai ke patut dikiraka mega nya taka semitan tauka tikas empas pekara ti ditulis nya ngagai raban pemacha. Nya mih kebuah, tiap-tiap ayat ti ditempa patut dipikirka mega ari sukut ekonomis. Pemanjai tauka pemandak ayat, pemayuh tauka pemimit leka jaku dalam ayat ukai ukur ekonomis ba sesebengkah ayat nya. Ukur pemanah ayat nya diperatika ari taka ni ayat ti ditempa digaga nya ulih diguna sereta meri empas ngagai raban pemacha.

Tukuh ayat ti dipilih ke deka ditempa nya mega patut diperundingka ari sukut engkeman tauka enda enggau tuju pekara nya ditulis, ulih tauka enda iya meri empas ke deka dikinginka penulis nya. Ayat baka, ‘Manah amat ukir tu’ ambika chunto tentu bisi meri empas ngagai pemacha enti dibanding enggau ayat, ‘ukir nya manah amat’.

Elemen logik, iya nya sistem bepikir ti ditusun datai ke ulih diterima akal runding ti gerai mega komponen ti beguna lebuh nempa sesebengkah ayat. Nambahka nya faktor logik mega semampai bekait rapit enggau pengulih nguna jaku sukung ti manah. Pekara tu ke ngasuh ayat ti ditempa nya semitan ngagai raban pemacha.

Nguasa leka jaku enggau ngaga ayat ti semitan dikena ngasilka karang tulis ti manah bedau chukup alai ulih ngumbai orang nya anda ba sukut nulis. Penulis mega enda tau enda nguasa sereta ngembuan teknik nulis ti semitan.

Pengelandik nulis genteran ayat nya siti teknik ti patut dikembuanka penulis. Baka ni deka nempa genteran pemuka ti ulih narit ati raban pemacha awakka iya terus macha genteran ke bukai ti nangkanka nya endang patut diperati sereta diperundingka enggau lenak. Kebuah pia, endang enda ulih dikenda mega penulis mesti ngepunka karang iya enggau genteran pemuka.

Genteran pemuka sereta tiap-tiap genteran ti diasilka nya patut kemas. Aspek kemas tu ulih diperatika ari sekeda sukut. Genteran ti kemas nyadi asil ari ayat topik dalam genteran. Ayat-ayat bukai dalam genteran nya nyadika pengerembai topik nya.

Tiap-tiap genteran ti digaga nya enda ulih enda ngambarka enggau terang idea tauka runding ti deka dikenataika, nemban sereta mudah diperetika pemacha. Enggau nya mega, pemacha enda mudah beba tauka ngembuan tanda tanya pasal reti pekara ti deka dikenataika penulis.

Nambahka nya mega, tiap-tiap genteran ti ditulis mesti bisi jaku penanda kaul penemu. Kaul tu patut dipancharka enggau terang maya nulis ayat enggau ayat bukai dalam siti-siti genteran, lalu dientudika enggau kaul genteran entara genteran ti bukai. Dikena ngasilka kaul tu, bisi sekeda chara ulih dikena. Nandu sesebengkah leka jaku ti beguna dalam sesebengkah karang mega ulih nempa kaul, ambika banding, dalam artikel tu, leka jaku ‘landik enggau ‘anda’ entara leka jaku ti suah amai disebut. Nandu pekara tu enggau suah nempa kaul penemu. Ngulangka pekara tu mega nyaup mantaika idea tauka batang runding dalam karang.

Siti agi chara dikena ngaulka penemu entara ayat enggau ayat tauka entara genteran enggau genteran nya ngena leka jaku ganti nama. Ambika bandiing, ngena leka jaku ganti nama diri empu ulih nempa kaul penemu. Leka jaku baka aku, kami, iya, sida nya sekeda ari jaku ganti nama diri ti ulih dikena ba sesebengkah karang tulis dikena nempa kaul penemu. Mayuh jaku penanda kaul penemu baka taja pia, tang, agi mega, nambahka nya, berindik ari nya enggau ti bukai ulih dikena ngaulka sesebengkah genteran enggau genteran ti bukai.

Kaul penemu entara ayat enggau ayat lalu genteran enggau genteran ba sesebengkah karang tulis deka ngasuh ayat enggau genteran nya dipeda lanchar. Reti nya nadai agi idea tauka runding ti tinggal laban tusun enggau penyerakup entara ayat nya endang udah betusun sereta berurun enggau manah.

Taja pan pengelandik bejaku sereta ngembuan teknik nulis dikuasaka enggau manah, penulis mega enda tau enda nguasa sereta meretika enggau lenak pekara ti deka ditulis. Enti sema pekara ti ditulis nya enda dikemeratka iya tau ngujungka asil karang ti ditulis nya semina dipeda manah ari sukut jaku enggau teknik nulis aja. Nya kebuah, kadang-kadang kitai bisi tebachaka karang ti penuh enggau ayat ke bebungai tang nadai isi. Kebuah pia, laban isi karang nya mabung tauka idea ke dikenataika nya enda engkeman.  Tu tau ngujungka raban pemacha mejah utai ke dituliska penulis nya.

Enti penulis semina ngembuan pengelandik bejaku, teknik nulis enggau nemu pekara ti deka dikenataika aja nya mega bedau ulih nyamin iya tau dikumbai landik tauka anda. Taja pan penemu bejaku betambah, penemu senentang teknik nulis mega ditemu iya lalu disiplin penemu ba sebengkah bidang mega dikuasaka iya tang nya bedau ulih ngayanka orang nya landik tauka anda dalam sukut nulis.

Anda nulis semina ulih dijapai enti sema orang nya seruran ngelatih sereta ngiraika diri nulis. Nya mih kebuah, baka ke udah disebut tadi, orang nya mesti besedia bekereja enggau bebendar betunggang lupung bepansuhka penemu. Kelimpah ari nya mega, iya patut semampai nulis laban nya ulih ngelatih iya nyadi orang ke anda ba sukut bejaku, landik bekenaka mayuh bengkah teknik nulis sereta anda mega dalam bepikir.

Berindik ari penemu di atas tau disimpulka runding senentang pengawa nulis (enti nya tau dikumbai pengawa) endang semampai begunaka latih, awak ti panjai dikena ngauk mayuh macham penemu enggau peneleba kelimpah ari ti liat ati ngansahka pengelandik nulis.  Munyi ku sempama jaku tuai; sebelansai pan batu chanai enti enda diajung bumai bedau tentu bulih padi, segantang pan batu lua kenyalang enti enda ditandang nyerang enda mih tetumbangka tiang jangka lelabi. Semua kriteria ke udah dirintaika ditu endang diarapka ulih mantu ngerembaika pengerindu siku-siku ke ngembuan pengingin nyadi ‘penulis’ nyadi ‘penulis ti ngasilka karang tulis ti bekualiti’, ari ke ‘enda bedaya’ ngagai ‘bedaya’ nusun runding sereta pikir ti logik, ngayanka ekspresyen ti terang sereta ngenataika iya enggau manah sereta ngerinduka ati raban pemacha. Karang ti manah sempama baka bukit ti meruan punjung; baka simpai meruan sabung. Nya mih kebuah, adat lesung bededak, adat periuk bekerak patut bendar dipegai nyadi prinsip penulis lati laban iya asil ari ke anda ba sukut jaku enggau runding.