Pekara
ke dikenang aku dulu ari tu nya bekaul enggau pengelati penulis asil ari anda
jaku. Kesekali tu buah kenang artikel tu pasal pengawa nulis ke ulih nempa
pengelandik bepikir. Komunikasyen nengah chara nulis nya beguna amat dalam
pengidup besehari-sehari ketegal mayuh pekara ulih dikenataika tauka dipadah
nengah chara nulis. Pengawa betulis udah nyadi sistem alai nyimpan penerang
dikena nganti untak tauka pengingat mensia.
Kitai
mega ulih ngerikod mayuh bengkah pekara, utai ke nyadi, peneleba enggau ti
bukai awakka ulih dibacha sereta nyadika sanding penemu ngagai orang bukai.
Kereban tulis tan disimpan lama laban pekara ke ditulis nya ditulis kitai ba
dalam tukuh surat, bup, majalah, jurnal, isi komputer enggau ke bukai. Kelimpah
ari nya, kereban tulis ulih dibeli tauka disimpan ba librari ngambika ulih
nyadika sanding penemu sereta dibacha barang maya.
Munyi ke
udah disebut di atas tadi, nulis nya siti ari pengawa komunikasyen ti beguna
amat. Nya kebuah, pengelandik nulis nyadi siti ari pengelandik bejaku ti beguna
amat lebuh belajarka jaku di sekula. Aktiviti nulis tauka ke nemban agi disebut
nya ngarang nyadi siti komponen ti besai bendar reti dalam peresa ba tikas
Ujian Pencapaian Sekolah Rendah (UPSR), Pentaksiran Tingkatan 3 (PT3), Sijil
Pelajaran Malaysia (SPM) enggau Sijil Tinggi Persekolahan Malaysia (STPM). Maya
peresa, pengelandik ngarang ulih nentuka pemutus peresa siku-siku pelajar,
ambika chunto ba keretas jaku Iban SPM karang ngungkupka mark 50 ari 100%. Pengelemi maya nulis ulih meri pangka ke enda
manah dalam pemutus peresa ambika banding keretas jaku Iban, kadang-kadang nya
ulih ngasuh nembiak turun gred, pangkat tauka enda mujur dalam keretas nya,
tang ke balat agi enti nya keretas jaku Melayu laban iya tau mega ngasuh turun
gred, pangkat tauka enda mujur dalam semua subjek ke diambi iya dalam peresa. Nya
ngayanka pengawa nulis tauka ngarang tu patut bendar diberi peratika raban
nembiak.
Pengelandik
nulis mega beguna ba subjek bukai. Fakta tauka isi pelajar tiap-tiap subjek ke
dipelajar disimpan dalam minda nembiak
tang patut dibantaika baru dalam tukuh tulis. Besenutuk enggau nya mega,
nembiak enda tau enda nemu sereta nguasa mayuh bengkah tukuh tulis ngambika
semua isi pelajar ulih dikenataika enggau semitan bepelasarka tuju subjek nya. Enti
nadai pengelandik nulis tentu penemu ke dikeulihka iya enda ulih dibantai tauka
dikenataika enggau manah maya peresa, ngujungka meri empas ngagai pengulih
akademik nembiak.
Kelimpah
ari nya, pengelandik nulis mega beguna dalam pengidup sepengudah tembu
besekula. Bisi orang nulis dikena iya ngulihka upah duit, nama tauka nitihka
utai ke dipinta. Nama-nama pan kebuah kitai nulis tuju iya endang dikena bekomunikasyen.
Ambika banding, ba era pemansang teknologi penerang, nulis agi mih diguna tang
nengah chara ti bebida, baik nya dikena maya aktiviti chatting tauka nulis sistem jaku pesan pandak (SMS). Pengedut
enggau pemandak pekara ti tulis tauka urup nyata bendar maya nulis chara tu.
Taja pia, fungsyen nulis nya agi diguna. Ba luar pusin guna teknologi penerang,
nulis nya agi beguna dalam pengidup kitai. Kitai patut landik nulis abis kurang
iya jaku selit ngelansa senentang mayuh macham pekara ke dikena kitai ba diri
empu tauka ke deka dikenataika kitai ngagai orang bukai. Enti kitai nadai
ngembuan pengelandik nulis dia kitai deka napi penanggul maya nulis mayuh
macham pekara baka maya nulis not, ngisi pom, nulis surat enggau ke bukai.
Kelimpah ari nya mega, kitai mega ngasaika diri bisi penanggul deka ngerikodka
peneleba pait manis pengidup kitai ba diari tauka bup biografi.
Nulis
tauka ngarang ukai sebengkah pengawa ti muntang dikereja. Nya kebuah mayuh
orang enda landik nulis. Ba sesetengah nembiak, sida tusah deka ngasilka karang
ti manah baik nya maya peresa tauka maya belatih bejaku ba kelas. Pengelemi tu
lalu dibai sida pansut ari rampa sekula maya sida udah badu besekula. Sida enda
ulih nulis enggau manah ambika banding dalam jaku Melayu enti nya bisi diguna
dalam pengidup sida jemah ila. Nya mih kebuah, mayuh orang serebana madahka
bisi sekeda nembiak enda ulih bejaku Melayu tauka English enggau betelipi baik
nya ari sukut jaku sebut tauka tulis sepengudah sida tamat besekula.
Nya mih
kebuah, besenutuk enggau nya, penanggul maya nulis seruran dikaitka enggau
peragam ke madahka pengelandik nulis nya bepanggai ba pengulih pemai ada
siku-siku. Kitai semampai ninga orang madahka nulis nya pemai ada ke
dikembuanka siku-siku orang tauka pengulih ke diberi Petara tauka Tuhan. Anggap
ti baka nya ngasuh sekeda bala nembiak sekula tauka mensia mayuh enda tentu
landik nulis. Endang sigi bisi pengamat mega pengelandik nya utai ke datai ari
Petara tauka Tuhan tang tiap-tiap pengelandik mega ulih dikuasaka sapa-sapa ke
sanggup belajar.
Taja pan
nulis tauka ngarang nya ukai pengawa ti mudah, tang pengelandik nulis ulih
dipelajarka semua orang. Nulis begunaka kitai seruran belatih kelimpah ari ke
nguasa penemu senentang nulis. Reti nya, pengelandik nulis ulih ditempa enti
penemu nulis nya diberi nengah tukuh latih ti sistematik, intensif sereta
meruan diberi belama.
Pengelandik
nulis mungkur pengelandik kognitif enggau lingusitik. Pengelandik kognitif meri
perati ngagai pengelandik penulis ngulihka idea sereta baka ni idea nya deka
dikenataika dalam karang kitai nya. Lalu pengelandik linguistik nya bekaul
enggau aspek jaku sereta teknik maya nulis. Kedua-dua pengelandik tu dikena
seretai maya proses nulis.
Ari
sukut realiti, nulis tauka ngarang endang tuju iya deka madah tauka nyeritaka
sesebengkah pekara. Nya mih kebuah, empas ari pengingin deka madah tauka
becherita nya ngasilka mayuh bengkah karang baka karang ripot, karang randau,
dialog, imaginatif enggau ti bukai. Mayuh bengkah karang tu asil ari tuju asal
kitai nulis. Ambika banding, enti kitai nulis laban deka mantaika serebana
tauka komplin ngagai pemesai ke bekuasa tentu kitai patut nulis surat pekirum
rasmi lalu enti pekara ke deka ditulis kitai bekaul enggau utai ke dipansik
tentu kitai patut nulis ripot.
Nya mih
kebuah, ba aktiviti di sekula, nembiak patut nemu tuju sida nulis tauka
ngarang. Enti tuju nulis nya dikena ba pengelandik bejaku baka ba aktiviti
karang, fokus nulis nya lebih ngagai ngelatih sereta ngangkatka pengulih jaku
nembiak lebuh sida ngenataika runding enggau kreativiti sida. Ba hal tu, aspek
jaku sereta pengulih ngenataika isi ke betul bepelasarka topik karang nya mih
ke patut dikemeratka pengajar enggau nembiak iya.
Taja
pia, enti tuju nulis nya ungkup subjek bukai, dia aktiviti nulis nya lebih
ngagai tuju ngeluaka baru fakta, konsep tauka isi pelajar subjek ke dipelajar
nya. Ba hal tu, iya nadai meri perati ti berat ngagai aspek jaku. Besenutuk
enggau nya, maya proses ngarang, nembiak begunaka penemu ti dalam senentang
sesebengkah topik ke deka ditulis iya. Udah nya, nembiak dipinta nerangka idea
tauka ngerembaika pekara tauka isi ngambika raban pemacha tauka pemeresa bisi
pengarap macha isi tauka fakta ti dikenataika nembiak.
Penemu
sereta pengulih nguasa pekara ti diajar nya mega beguna ba nembiak tauka
penulis. Mar bagi orang nya nulis enti iya enda nemu penerang tauka isi pekara
nya. Penemu silik senentang pekara tu ngasuh penulis ulih nulis enggau lanchar,
terang sereta berurun. Penemu tu dikauk nengah macha tauka peneleba. Peneleba
nyangka dikulih ari peneleba diri empu tauka peneleba orang bukai.
Sepengudah
kitai nemu pekara nya, siti-siti karang tauka tulis nya enda ngenataika asil ti
manah tauka nyeratan enti iya enda digagaka langkar dulu. Nya mih kebuah,
sebedau siti-siti karang nya diasilka, kitai patut ngaga langkar karang dulu.
Langkar karang nya kiraka pengawa kasar ti nyadika malin maya nulis karang.
Tang taja pan baka nya, aspek tu mih ke suah ditinggalka nembiak ketegal
nembiak lalu terus nulis karang sereta nadai bepelasarka langkar karang.
Ketegal nya mih karang sida ngundan isi tauka idea ti enda engkeman, enda fokus
ngagai topik tauka pekara ti udah dipejuraika.
Nulis
karang enda tau enda ngundan sekeda genteran iya nya mungkur genteran pemuka,
isi enggau penutup. Genteran pemuka dikira chukup siti aja lalu genteran isi
ulih ngundan sekeda genteran bepanggai ba penyampau isi ti dipinta, lalu
genteran penutup pan chukup enggau siti aja.
Enti
kitai bisi langkar karang, dia karang kitai enda mudah rari ari topik. Kitai
deka nulis semina pekara ke patut aja. Reti nya, langkar karang nya mih ke nyadi
malin kitai bepikir ngulihka isi tauka idea ti bisi kaul enggau topik karang,
nyerenih tauka nyerara entara isi ti nemban enggau ke enda, nusun isi nitihka
pemesai guna ngambika karang kitai nya enda dipeda belunjak tauka panjai sereta
nadai kaul enggau topik.
Chunto
langkar karang nitihka rurun bepikir ti logik:
Topik: Pun Penatai Penyakit Kronik sereta Jalai
Ngurangka Penyakit nya.
Pemuka:
Konsep penyakit kronik
Isi
Karang: 1. Kebuah penyakit:
a. Ari pemakai
b. Utai kamah
c. Gaya pengidup enda bepengerai
2.
Jalai ngurangka penyakit nya:
a. Nguji begigaka ubat
b. Nengah ajar pengarap enggau moral
c. Beperesa pengerai
d. Gaya pengidup ti bepengerai
Penutup: Tiap-tiap penyakit tentu bisi ubat
Langkar
karang mega ulih ditempa belalauka sekeda tanya. Sekeda ari jaku tanya ti ulih
dikena nya baka ‘nama’, ‘sapa’, ‘kemaya’, ‘dini’, ‘baka ni’ enggau ‘lapa’. Ari
tanya nya tadi sekeda idea ulih dikerembaika ngambika lenak agi, terang sereta
mudah dipereti. Enggau nya mega, mayuh genteran ulih digaga. Kelimpah ari ke
begunaka jaku tanya ngagai sesebengkah taga penemu tauka topik karang, iya mega
ulih nyadi siti strategi ti semitan dikena ngasilka idea.
Sepengudah
teulihka isi ti beguna lalu nyediaka langkar karang ke nyadi malin lebuh nulis
dia isi nya tadi deka dipasuk ke dalam genteran. Dua pekara ti beguna amat
dalam siti-siti genteran iya nya batang isi tauka batang pekara enggau penerang
dikena nyukung isi nya. Engkah batang isi ba ayat keterubah dalam genteran;
tauka ba ayat pengujung dalam genteran nya; tauka ayat topik dibantai dua kali,
iya nya ba genteran keterubah tauka genteran penudi. Penerang ti nyukung nya fakta penyukung ke
ngerembaika isi pekara. Penerang penyukung tu ulih datai ari data, kerembai
penerang, chunto, pekara ti dipejuraika, pekara ti manding sekeda penemu enggau
ke bukai ti ulih nyadi elemen dikena negapka batang isi.
Nangkanka
nya aktiviti nulis. Ba renggat tu, pekara ti bisi kaul enggau jaku sereta
mekanis patut ditejuka dulu. Utai ti beguna ba renggat tu iya nya ngasilka ayat
ti dipikirka patut sereta engkeman dikena ngerembaika idea tauka batang isi ke
deka dikenataika. Nya alai, tulis mih nama-nama pekara ke mansa runding
bepelasarka langkar karang ti udah digaga tadi. Ba renggat tu mega, kitai patut
ngerembaika isi tauka idea. Anang guai ngaga kereja nyeruri maya tu.
Tusun pengawa
ti kepenudi dalam pengawa nulis tu iya nya pengawa ngedit tauka nyeruri. Tuju proses
nyeruri nya dikena negapka pekara ti ditulis. Tu mungkur pengawa ngubah tauka nginsur
dikena ngemanahka utai ke ditulis nya. Ba renggat tu, pengawa nyeruri nya
nyengkaum aspek jaku ari sukut sepil, guna jaku, frasa enggau ayat ti
ngelanggar atur jalai jaku, nya ke dikemetulka kelimpah ari ngemetulka ayat ti
kabur ari sukut reti enggau jalai jaku lalu mega ayat begantung awakka ayat nya
genap sereta nemban.
Pengawa nyeruri
ba elemen mekanis mungkur tusun gaya tulis. Ba renggat tu, genteran ti digaga
nya patut diperatika enggau silik ari sukut genteran pemuka, isi enggau
penutup. Kelimpah ari nya, aspek tanda bacha enggau format karang mega patut
diperatika. Nya mih kebuah, tiap-tiap iku nembiak patut nguasa semua aspek jaku
enggau mekanis ti bekaul enggau pengawa nulis.
Dikena nyimpulka
runding senentang pekara tu, kitai patut nemu endang nadai jalai muntang dikena
ngasuh kitai landik nulis. Pengelandik nulis enda ulih diapal laban iya ukai
fakta. Kebuah pia, laban pengawa nulis nya pengelandik ti kompleks lalu
begunaka latih nulis ti sistematik sereta pengawa ti patut meruan digaga
belama.
Tiada ulasan:
Catat Ulasan