Panyun jaku
16 May ninting taun udah dipilih nyadi sebengkah pengawa
ti dikumbai Hari Pengajar ketegal hari nya mega sama dalam taun 1956, Federal
Legislative Council udah nerima tuduh penemu Ripot Komiti Pelajar (Report Of The Education Commitee ) nyadika
polisi pelajar menua Malaysia. Dokumen nya dikumbai Laporan Razak, lalu diangkat nyadi Polisi Pelajar Bangsa kenyau ari
hari nya. Tuju ngintu Hari Pengajar nya diintu dikena:-
1. ngemeratka tanggung pengawa pengajar nempa
bansa (nyengkaum penyerakup enggau integrasyen), mai pemansang ngagai menua sereta
meri servis ngagai komuniti.
2. minta perati apai indai, nembiak sekula
enggau mensia mayuh ke tanggung pengawa besai ti ditangkup raban pengajar dalam
komuniti Malaysia.
3. nerenak semengat segulai sejalai gawa
enggau kaul ati ti manah entara pengajar.
4. ngangkatka tikas
penuduk pengajar dalam komuniti.
5. meri peluang ngilir sereta ngemansangka
pengelandik pengajar nengah seminar, konvensyen, nampung pelajar enggau chara bukai.
6. nimbang enggau objektif tanggung pengawa
pengajar bepelasarka tirai juru menua Malaysia lalu ngatur langkah-langkah ti
engkeman ngambika pengawa nya segemitan agi.
Reti Pengajar Penempa Menua Bansa
Tema Hari Pengajar taun 2016 tu iya nya Pengajar Penempa Menua Bansa. Uji
kitai sama beratika kerembai reti pengajar, penempa enggau menua bansa.
Pengajar nya mega dikumbai tukang tarak, pengiring tauka guro.Iya orang ti
meri servis dalam semua tukuh institusyen pelajar ti nyadi pengulu sereta pemai
pemansang pelajar menua. Pengajar mega orang ti ngembuan penemu ti dalam,
bepengelandik tinggi dalam bidang iya empu lalu bisi seregah diri ti dipuji
sereta ulih nyadika chuan enggau teladan ngagai orang bukai.
Penempa nya individu ti nempa,nukuh, ngangkat lalu niri negi sesebengkah
pekara ti dikena nyapai sesebengkah tuju ti dikinginka. Dalam konteks pelajar
sekula, pengajar nya penempa ti ngembuan tanggung pengawa nyadi individu ti
nempa lalu nukuh kualiti individu nembiak sekula dalam aspek selangkuh tubuh,
emosyen, spiritual enggau intelek (kognitif) dikena ngamatka aspirasyen tauka
niat pelajar.
Menua bansa nya seraban mensia dalam siti kaul menua ti tegap. Menua bansa
dalam konteks tu endang meruan bisi juluk ati dikena nentuka genap iku nembiak
sekula ngembuan pengelala diri ti tegap, bepatriotik,
bepegai teguh ba ajar pengarap enggau nilai moral, idup nyadi sebuah komuniti
ti bisi pengasih, demokratik, liberal, tolerans, bepikir enggau bebudaya
saintifik sereta berakup enggau pangan diri.
Kerembai Kenang
Dikena ngemujurka agenda pelajar menua lalu napi penguji Perambu Pemansang
Pelajar Malaysia (PPPM) dia tema Hari Pengajar tu dipilih awakka ngayanka
pengajar nya ijin ti beguna amat lebuh ngenegapka pemansang bansa nengah pengawa
belajar.
Pemansang pendiau bansa di Malaysia deka majak teguh sereta tegap enti
bidang pelajar ulih nentuka serak rebak baru ti diasilka nya serak ti lati ari
sukut holistik sereta ulih ngamatka pemisit pemansang menua enggau pekara guna
global. Pelajar ti manah sereta bekaul jaul nya nyadika malin dikena mensia
bepikir, merambu lalu ngatur sesebengkah pekara enggau betul sereta semperna.
Dalam konteks Malaysia, pemansang pendiau bansa mesti bepanggai ba pengingin
ati ti deka ngasilka peranak glokal iya nya peranak ti bepegai tegap ba
semengat nasional lalu berakalka internasional.
Dalam konteks tu, pengajar ngembuan tanggung pengawa nyadi penempa komuniti
ti bepenemu, pemai penyerakup, ulih ngasilka komuniti ti ngembuan pengarap
tinggi, ngembuan rega etika ti tegap lalu ulih besemekih ba tikas global.
Nengah transformasyen pelajar, pemansang pendiau bansa ulih ditegapka lebuh
pengajar nya bejalaika tanggung pengawa sida ngasilka mudal mensia ti ngembuan
pengelandik nyadi tuai, idup dalam komuniti demokratik, rentang, altruisma,
liberal, tolerans enggau bepengasih.
Pengajar mega patut sanggup nanggung pengawa berat ngasilka individu ti
lati ari sukut penemu kelebih agi ba bidang sains, teknologi enggau ICT,
Pengelandik Bepikir Tikas Tinggi sereta ulih bekomunikasyen enggau semitan
ngena mayuh bengkah bansa jaku. Individu ti diasilka nya mega ngembuan seregah
diri ti positif ngambika ulih ngenjuk pemeri ngagai pengelantang diri empu,
diri sebilik enggau menua. Nya alai, pengajar semampai sedia deka berubah,
bejalaika pengawa ari chara selama ngagai ti lain ari selama, bisi daya
pengetan, futuristik lalu bepikir tikas tinggi sereta ngembuan world class thinking.
Tuju enggau polisi ti nyadika juluk ati Opis Menteri Pelajar nempa Menua
Bansa nya dikena nentuka genap iku nembiak sekula ngembuan pengalala diri ti
tegap, patriotik, bepegai teguh ba ajar pengarap enggau nilai moral, idup nyadi
siti komuniti ti bepengasih, demokratik, liberal, tolerans, bepikir enggau
bebudaya saintifik sereta beserakup. Rega pemansang pendiau bansa tu patut
diterenak bepun ari renggat baruh pelajar nembiak.
Tanggung pengawa pengajar nya dikena nentuka serak pewaris menua nya anak
ti ditarak enggau pelajar ti enda bechiping. Niat menua ngagai pengajar nyadi
penempa menua bansa begunaka komitmen ti tinggi ari semua raban pengajar.
Penutup Jaku
Pengajar Penempa Menua Bansa engkeman bendar dipilih sereta diangkat
nyadika tema Hari Pengajar taun 2016. Pengawa raban pengajar ukai semina ngajar
dalam bilik kelas aja tang mega ngembuan tanggung pengawa nempa personaliti
enggau ulah nembiak seriran enggau ubah pemansang jeman kemaya hari tu. Kuasa
nguing runding sereta pengawa narak nembiak sekula mai empas ba ati raban
nembiak sekula.
Tiada ulasan:
Catat Ulasan